Ang Kamahinungdanon sa Pito ka Sakramento

(Part 3 of 3)

Ang Ikaunom mao ang Pagka-Pari o Holy Orders. Unsa man ang kamahinungdanon niini sa kaluwasan? Ang Pagka-Pari usa ka sakramento alang sa apostolikanhonng ministriya. Kini usa ka bokasyon nga espesyal nga pagtawag o pagpili  ngadto sa espesyal usab nga bulohaton sa pagpangalagad sa katawhan sa Dios nganha sa iyang Simbahan. Kini nagsugod  ug gitukod ni Ginoong Hesukristo diha sa katapusang panihapon, sa dihang gimandoan niya ang mga Tinun-an sa pagpadayon Yukaristiyanhong selebrasyon (cf. Mateo 26:26-28, 28:19-20 ug Buh. 1:8, Tito 1:5, 2 Tim. 1:6, Roma 10:14-15).

Ang Ikapito mao ang Kaminyoon. Unsa man ang kamahinungdanon niini sa kaluwasan? Ang Kaminyoon usa usab ka sakramento diin gihiusa ang lalaki ug babaye tungod sa ilang gugma ngadto sa altar sa kaminyoon aron mamahimo sila nga usa lamang isip magtiayon atubangan sa Dio.,Usa usab kini ka bokasyon, diin ang gugma ug panaghigalaay sa lalaki ug babaye motubo ngadto sa kahiusahan sa kasing-kasing ug kalag, aron sa pagpadayon sa kinabuhi. Uban ang ilang mga anak maglawig sila nga adunay kahiusahan sa pamilya sa Dios. Ang anak mao ang bunga sa paghiusa diha sa kaminyoon, ug pinaagi sa pagdawat niini nga sakramento gihatag kita ug katungod sa Dios nga makaambit sa iyang pagmugna sa tawo. Busa mamahimo ang magtiayon nga pro-creator, subay sa sakto gayud nga pamaagi nga ang magtiayon magpakasal gayud nganha sa Simbahan ni Kristo (cf. Gen. 2:24, Mateo 19:4, Efeso 5:25, 5:23-33).

Mao kini ang kamahinungdanon sa Pito ka sakramento. Kini naglangkob gayud sa hingpit nga buhat sa pagbalaan ug kaluwasan sanglit si Kristo mismo maoy naghatag niini nganhi kanato. Busa uban sa dakong respeto ug debosyon ato kining hatagag bili sa atong kinabuhi ug puy-an nato kini sa kanunay sanglit kini mao ang maghatag kanato ug kinabuhing walay katapusan.

No Comments

Post A Comment