Diyosesis sa Mati Nipadala sa mga laykong Magsasangyaw

MATI CITY – Solemneng seremonya sa pagpadala sa mga sinugo sa pagsangyaw sa Maayong Balita o mga lay evangelizers 2033 ang gipahitabo niadtong Mayo 17, 2014 sa Diyosesis sa Mati.

Ang ika-walo nga batch sa Catholic School of Evangelization naglangkob og trese ka mga partisipante nga sulod sa usa ka bulan nag live-inog libre sa Ursuline Sisters’ Retreat House alang sa subsob nga pormasyon—pagtuon, pagpamalandong, pag-ampo, pagbansay, ug  Mission Outreach, pinasubay sa pulong sa Diyos ug mga hiyas sa Langitnong Gingharian nga iya sa usa ka naga-hingkod nga disipulo ni Kristo.

Ang mga migraduar naggikan sa managlahing mga Gagmayng Kristohanong Katilingban (GKK) sa parokya sa San Nicolas de Tolentino Cathedral.  Sa ilang mga unang pangalan, nailhan ang lima ka lalaki nga sila si Brod:  Jaril, Alexus, Romar, Morgan, ug Miguel; samtang ang mga babaye mao sila si Sis: Geoline, Janice, Thea, Kyrl, Jocelyn, Inday, Bebeth, ug Vernalyn.

Gipahigayon ang Sending-forth ceremony sa Clergy House Chapel, Madang, Mati City, sulod sa kasaulogan sa Sagrada Eukaristiya nga gipangulohan ni Obispo Patricio H. Alo, kinsa usab maoy nangulo sa Opening Mass sa Chapel of St. Marie of the Incarnation sa Capitol Hills, Mati City, atubangan sa mga nag-unang batch sa Lay Evangelizers ug mga sakop sa Formation Team, ingon man, mga ka-pamilya, higala ug bisita gikan sa mga siyudad sa Mati ug Davao.

Mga mamumulong naglakip sa mga dinapit nga kaparian, kamadrihan, ug layko gikan sa Mati diocese, ug ni Fr. Edilberto “Loloy” Mahinay, ang spiritual director sa Evangelization 2033, nga nagpalaum sa tema nga “Put out into the deep,” dugang sa pagpasabut nga “Ang kinabuhi nga gihalad alang sa Diyos maoy kabilin nga malungtaron”.

Human sa Sending-Forth Ceremony, misunod ang Fellowship Program sa Tagawisan Elementary School nga nagpasundayag sa mga makalingaw ug makatandog nga talento sa awit, sayaw ug drama, mga personal testimony ug mensahe gikan sa mga mi-graduar ug mga sakop sa unang mga batches, ug mga bisita gikan sa Davao.

Ang team leader  sa naasoyng Evangelization School mao si Brod Edgar Roble, ug ang staff naglakip nila Brod Lucas Salonoy, Loloy Jacubos, Jonathan Jaime, ug Sis Ruby Manlangit; samtang ang nagdumala sa kinatibuk-ang dagan mao si Sis Neneng Niez Ignacio.

Mapasalamaton ang tanan sa mga donors, volunteer cooks, Ursuline nuns, ug sa tanan nga mitampo alang sa kalampusan sa Catholic School of Evangelization 2014 sa Diocese of Mati.

No Comments

Post A Comment