Sta. Ana Shrine Parish, Balay Alampoanan

Sugod Hulyo Minusan ang kasal

Ang Santa Ana magsaulog sa ika-65 Parochial Fiesta karong umaabot nga July 26 sa tema “Santa Ana ug San Joachim: Matinud-anon sa Kristohanong Pamilya”. Kini ang ika-15 na katuig isip SHRINE.

Natukod ug nahimong Parokya ang Santa Ana niadtong July 26, 1949 sa kakugi sa atong kanhing mga pari nga missionary nga gikan sa Province of Quebec (Society of Foreign Mission of the Province of Quebec) nga gitawag nato og PME Fathers. Si Rev. Clovis Thibault, PME ang superior sa maong Society of Foreign Mission. Kini natukod nga bag-ong Parokya subay Canon Law 216.

Niadtong August 18, 1948 ang Foreign Mission Society of Quebec nakapalit sa yuta nga gitamnan ug mga lubi ug tropical trees sulod 33,551 square meters, sa kantidand nga seven thousand pesos lamang. Ilang napalit kini gikan sa Bustamante ug Kong Kang Long families. Kini mao ang gitukoran sa San Pedro Hospital, San Pedro College, PME Regional House, Holy Cross of Davao College, CYO Gym ug ang atong Simbahan, Santa Ana Shrine.

Niadtong Enero 6, 1949, kasaulogan sa Epipaniya, gipanalanginan ang bato sa kanto sa Santa Ana Parish pinangulohan ni Fr. Clovis Thibault (Superior of the Mission) inubanan ni Fr. Paquia (of Society of Jesus), vicar general of Zamboanga Diocese, ug Fr. Conrad Cote, PME ang unang Parish Priest.

Ug niadtong July 24, 1999 gihimo ang Solemn dedication of the Church as a “Shrine” at 6:00 pm gipangulohan sa atong Emeritus Archbishop Fernando Capalla, DD. Kining atong Parokya gitawag og Shrine tungod sa daghang mga tawo mobisita aron mag-ampo. Dunay 24 hours nga adoration chapel aron maka-ampo ang mga tao. Ato usab giminusan ang kasal sugod karong Hulyo, ang mga kasal duha na lamang sa usa ka adlaw kay ang atong parokya usa man ka Shrine—balay alampoanan.

Apan subo kaayong palandungon nga ang Sta. Ana Shrine Church, nabantug ug nailhan na hinuon nga lugar “kasalanan” for special weddings—dili na “balay alampoanan”. Lisud kaayong dawaton, isip yanong magtoto-o nga human sa kasaulogan sa Santos nga Misa ug Sakramento sa kasal, ang simbahan wala nay kalainan sa public park, convention hall o reception hall. Nagyagaw ang mga wedding coordinators, mga photographers nag-iyahay og pwesto ug pamaligya sa ilang mga litrato ug ang wedding entourage mora na’g fashion show. Nawala ang respeto sa kasagrado sa Simbahan.

Mao nga niining ika-65 nga tuig, isip usa ka SHRINE ni Sta. Ana, nga Inahan ni Maria, atong Inahan, gipaningkamotan ug gi-ampo sa mga parokyano nga mahibalik ang kabalaan sa Simbahan—usa ka balay alampo-anan nga naghatag og luna ug kahigayonan, aron masinati ug mahimamat ang Ginoo, bisan pa man sa kaguliyan sa atong kasingkasing.

Kami, isip mga deboto ni Santa Ana ug San Joachim nga iyang bana, naghangyo kaninyo nga moduyog sa among lunsay’ng tinguha nga ang Santa Ana Shrine magpabiling alampo-anan nga iyaha sa Ginoo, dili alang sa mga mapahimuslanong katawhan.

Malipayon ug maampoong piyesta ni Santa Ana kaninyong tanan!