Isipa Siya Nga Dili Magtutuo

Ika-23 nga Domingo sa Ordinaryong Panahon
Ez. 33:7-9/ Ps. 95:1-2, 6-9/ Rom. 13:8-10/ Mt. 18:15-20

Ang panagbingkil kabahin sa Kristohanong relasyon ug katilingbanong kinabuhi nga naglawig padulong sa kalamboan. Apan dunay mga panagbingkil nga usahay inay masantup sa panag-uli, makapalalum na hinuon sa pagkabahin-bahin ug pagdumot.

Ang Kristohanong katilingban sa panahon ni San Mateo dili halayo niining maong kasinatian. Gikinahanglan ang proseso aron makab-ot ang kahapsay ug panag-uli human sa panagbingkil.

Una, ang inigsuong pasidaan pagpadayag sa respeto sa isigkatawo. Pinaagi ni Propeta Ezekiel, kita gipahimangnoan nga pasidan-an nato ang atong isigkatawo aron siya mobiya sa dautang buhat. Kining inigsuon nga pagpasidaan himuon dili sa publiko kondili sa pribado nga paagi aron dili siya maulawan sa kadaghanan. Hinaut nga dili nato ipanabi ang sayop sa ubang tawo kondili ato siyang estoryahon uban sa pasidaan nga inigsuon.

Ikaduha, ang katilingbanong paghigugma nagpakita sa malukpanong responsibilidad sa paglihok sa kaluwasan. Sa sulat ngadto sa mga taga-Roma, kita gihagit nga dili magapos sa utang gawas sa gugma. Ang gugma sa isigkatawo wala maghuna-huna sa hakog nga relasyon kondili katilingbanon. Kini panaw uban sa kadaghanan ug dili pansariling kasiguroan lamang. Hinaut nga dili kita masentro sa kaugalingon, kondili moduyog sa espirituhaong panaw nga katilingbanon.

Ikatulo, ang Diosnong kaluoy nagdala sa hingpit nga pagpasaylo. Ang dili mamati, matud sa Ebanghelyo, isipon nga usa ka dili magtutoo o kobrador sa buhis. Si Kristo midawat ug wala mihusga sa makasasala. Siya mitagad sa dakung pagpaubos ug pagpasensiya sa mga nahisalaag. Hinaut nga dili lamang kita kanunay mangayo nga kaluy-an, kondili kita usab magmapasayluon ug magmaloloy-on.

Tinuod nga lisud ang pagmahal sa tawong dili sayon dawaton, sa tawong dili angayan pasayluon, sa tawong kanunay nakasala. Apan dili imposible nga uban ni Kristo kita moambit sa Diosnong kaluoy nga magdala kanato sa panag-uli ug kahiusahang katilingbanon.

No Comments

Post A Comment