May Gibuhat vs “Eat All You Can”

Sa Biblia (Mateo 9:20-22) mabasa nga usa ka babaye naayo sa iyang sakit tungod sa iyang pagtuo nga kung makahikap siya sa sidsid sa sapot ni Jesus. Importante ang iyang pagtuo, apan naayo siya sa diha nga nakahikap siya – may pagtuo, ug may gibuhat.

Nagpasabot nga miuyon ang Dios sa iyang kaugalingong pamaagi. Ang paghikap – iyang kaugalungong pamaagi kay wala man kini isugo ni Jesus ug wala pud isugo sa mga apostoles. Gani, ang mga apostoles nagbadlong pa niining babaye. Tinuod si Jesus nagsugo, “Pangayo, Pangita, Pagtoktok…” Hinonoa, alang kanato, dili igo nga “sugoon” nato ang Dios pag-ayo o pagbuhat sa atong gipangayo. Dili igo nga moampo kita “Ginoo, hatagi ako sa maayong panglawas” ug unya pataka ug patuyang lang kita og kaon “eat all you can.”

Nahiuyon ba sa kabubut-on sa Dios nga kita mokaon bisag unsa ug patuyang sa pagkaon, “eat all you can”? Kung nahiuyon sa kabubut-on sa Dios ang atong buhat ug hunahuna, nan, duna kita’y kaalam apan kung wala mahiuyon, nan, mao kini ang giingon, “wisdom of this world.” Sa Biblia akong nabasa, ang Ginoo nag-ingon, “. . . kamo dili na iya sa kalibutan; busa nasilag kaninyo ang kalibutan.” (Juan 15:19)

Sa laing bahin (Juan 5:1-5), dunay laing paagi. “Ang masakiton nga makauna sa pagkanaog ngadto sa linaw human kini makutaw mamaayo sa bisan unsang sakit.” Daw lumba, wala gisulti kung may pagtuo, buotan, o Kristiyano. Dinhi klaro nga mamaayo ang molihok, may gibuhat ug makauna pa gyud.

Ang atong Langitnong Amahan naghatag na sa Iyang katawhan sa tanan nga atong gikinahanglan bisan ang kamatayon sa Iyang Bugtong Anak. Apan ang makalihok, molihok ug maghago, maningkamot. Ako nagtuo nga bisag unsa ang atong pangayoon sa Ginoo, kinahanglan mag-ampo pod kita nga Iyang tudlo-an sa kinahanglan nga tong buhaton.

Sa telebisyon, dunay pari naghangyo nga i-ampo nato ang mga pari nga dili kaayo maantigo mohatag ug homily. Tinuod, kinahanglan nato kanunay nga mag-ampo sa mga pari, apan kinahanglan pud nga sila magtuon diha sa Biblia, dili sa mga teleserye ug istorya gikan sa mga libro nga lahi sa Biblia.