Gugmang Balaanon Sa Isigkatawo Buhaton

Ika-30 nga Domingo sa Ordinaryong Panahon
Ex. 22:20-26/Ps. 18:2-4, 47, 51/1 Thes. 1:5-10/
Mt. 22:34-40

Gisumada ni Hesus ang mga balaod ngadto sa duha: ang paghigugma sa Dios ug paghigugma sa isigkatawo. Kining duha dili kompetensiya sa usa’g usa. Ang tinuod nga paghigugma sa Dios magbunga sa paghigugma sa isigkatawo.

Sama sa duha nato ka mata, duha ka dalunggan, duha ka tiil, duha ka kamut, ug uban pang paris nga parte sa atong lawas, kining duha ka sugo maoy angay nga maghatag og kahulugan ug kusog sa tanan natong gibuhat ug mga taras. Anga paghigugma nato sa Dios maoy atong kalig-on ug ang paghigugma nato sa isigkatawo maoy pagmatuod sa atong pagsabot niining maong gugma.

Gipahimangnuan kita sa ikaduhang pagbasa nga sama sa mga taga Tesalonica, sundon unta nato ang Dios aron mahimo kitang panig-ingnan sa uban. Sa tinuoray unta simbahon nato ang Dios. Sa kinasing-kasing unta siya atong ampoan. Kung lalom og dulot ang atong pag-ila Kaniya, kini makadasig sa uban sa pagsunod kanato.

Kining panig-ingnan madayag diha sa pagkamanggiluy-on pinaagi sa pagpahulam sa uban nga walay tubo. Kung ang tawong naglisud moduol kanato, siya nanginahanglan sa atong tabang ug angay nga dili kita maghimo sa iyang kinabuhi nga mas lisud, kondili magpagaan unta kita sa iyang kahimtang. Iuli usab unta nato ngadto sa tag-iya kung unsa man ang atong gihulaman. Ang dili ato ibalik nato sa tag-iya aron kita usab dili magpabug-at kaniya.

Kung ang atong debosyon sa rosaryo ug pagka-aktibo sa Kristohanong katilingban dili makapagaan sa pagbati sa atong isigkaingon, tingali og kimpang ang atong gugma. Kung ang atong kanunay nga pagpaminaw sa Pulong ug ang pagkalawat sa Lawas ni Kristo dili makapaduol kanato sa usa’g usa, tingali og walay ngipon ang atong pagkarelihiyoso. Ang gugma mahimo lamang balaanon kung sa isigkatawo kini atong buhaton.