Mga IP gipasidunggan

Sa pagsaulog sa Indigenous Peoples Sunday niadtong Oktubre 12, gipasidunggan sa Archdiocese of Davao ang mga Lumad pinaagi sa pagsaulog sa adlaw kauban nila didto sa Baguio District, Calinan, Davao City.

Pinaagi sa Misa nga gipangulohan ni Bishop George B. Rimando nga maoy nagpuli sa schedule ni Abp. Romulo G. Valles, gisaulog ang IP Sunday sa covered court sa Barangay Baguio Proper Gym kauban ang chairman sa Catholic Bishops’ Conference of the Philippines-Episcopal Communication on the Indigenous Peoples nga si Bishop Prudencio Andaya, Jr., CICM.

Subay sa tema nga “Lumadnong Kinabuhi: Bulawan luyo sa mga kalisdanan” giingon ni Bishop Rimando sa iyang homiliya nga bulahan ang mga IP kay anaa ang ilang pagtoo sa Diyos bisan pa man sa tanang kalisdanan.

Gisaysay usab niya ang pipila sa mga pagpanglupig ug pagpang-abuso sa mga pipila ka mga settlers ngadto sa mga Lumad sama sa pagkuha sa ilang yutang natawhan tungod sa logging, mining, ug uban pa.

Gihagit niya ang katawhan nga anaa niadtong misa nga sila gitawag aron mutabang sa mga IP nga maoy usa sa mga sektor nga nabiyaan ug wala natabangan.

Giingon usab ni Bp. Rimando nga importante ang pag-ampo alang sa usa’g usa—pag-ampo nga giubanan sa buhat.
Gipanalanginan usab ni Bp. Andaya ang mga lumad human sila nagpahulagway kauban ang mga concelebrating priests ug si Bp. Rimando.

KALINDONGAN 2014

Gitapos usab ang Kalindongan 2014 niadtong milabay’ng Domingo, didto sa Pamulaan Center for Indigenous Peoples Education, Mintal, Davao City. Ang Kalindongan 2014 usa ka panagtapok sa mga representante sa mga IP Apostolate sa sa tibuok Pilipinas ug mga grupo nga nagatabang sa mga IP.

Gisugdan ang maong kalihukan niadtong Oktubre 9, diin ilang gihisgutan ang mga kasinatian sa mga IP ug kasinatian usab sa mga misyonero nga miadto sa mga kabukiran aron mahimamat ug matabangan ang mga Lumad.

Gitapos nila ang ilang kalihukan pinaagi sa Misa nga gisaulog ni Abp. Romulo G. Valles kauban si Bishop Andaya. (@johnfrancesf)

No Comments

Post A Comment