Ang Epekto Sa Bunyag

P: Mahimo bang maluwas ang walay Bunyag?

T: Sanglit si Cristo namatay alang sa kaluwasan sa tanan, mahimo nga maluwas sila nga walay bunyag, kadtong namatay alang sa pagtoo (Bunyag sa dugo). Ang mga katekumeno ug silang tanan, nga bisan kon wala makahibalo kang Cristo ug sa Simbahan, matinud-anong mangita gihapon sa Dios (ubos sa pagdasig sa grasya) ug nagatinguha pagtuman sa iyang kabubut-on mahimo usab nga maluwas nga walay bunyag (Bunyag sa pangandoy). Diha sa iyang liturhiya ang Simbahan nagatugyan sa mga bata nga nangamatay nga walay Bunyag ngadto sa kaluoy sa Dios.

P: Unsa man ang mga epekto sa Bunyag?

T: Ang Bunyag nagawagtang sa sala nga panulundon, sa tanan nga mga personal nga sala ug sa tanang silot tungod sa sala. Naghimo kini sa binunyagan nga magsasalmot diha sa diosnong kinabuhi sa Trinidad pinaagi sa grasya nga makapasantos, sa grasya nga makapatarong nga nagpahisakop kaniya ngadto kang Cristo ug ngadto sa iyang Simbahan. Naghatag kini kaniya og kabahin diha sa pagkapari ni Cristo ug sukaran sa kahiusahan uban sa tanang mga Kristiyano. Nagpadangat kini sa mga teyolohikanhong birtudes ug mga gasa sa Espiritu Santo. Ang binunyagan iyaha ni Cristo hangtod sa hangtod. Siya gipatikan uban sa dili mapapass nga selyo ni Cristo (karakter).

P: Unsa man ang kahulogan sa Kristohanon nga ngalan nga nadawat sa Bunyag?

T: Mahinungdanon ang ngalan tungod kay ang Dios nakaila man sa matag usa kanato sa atong ngalan, sa ato mismo nga pagka talagsaon isip mga persona. Diha sa Bunyag ang Kristiyano nagadawat sa iyang kaugalingon nga ngalan diha sa Simbahan. Labing maayo gayod kung gamiton ang ngalan sa usa ka Santo nga makahatag og sumbanan sa pagkabalaan ug pasalig sa iyang pangama sa atubangan sa Dios. (Kompendiyo sa Katesismo sa Simbahang Katoliko, 262-264)