Ang Pag-ampo ug Pa-misa sa patay may bayad ba? (Part 1 of 2)

Ni : Bro. John Reyes ug Bro. Ronald Rondina
Catholic Faith Defenders
San Antonio de Padua Parish, Agdao, Davao City
Email: john_faith06@yahoo.com and Cell # 0948-9751417

Gisaulog nato ang Adlaw sa mga minatay,(Nobyembre 2). Kini subay sa tradisyon sa atong Simbahan nga bisan tuod patay na ang atong mga minahal gikinahanglan gihapon nato silang handomon isip mga Kristiyanos, sanglit bisan ug patay na ang atong mga minahal sa kinabuhi wala magpasabot nga nahibulag na sila kanato.

Si San Pablo nag-ingon “una sa tanan ako nangaliyupo nga ang atong mga pag-ampo, mga pasalamat ug mga pangamuyo atong ipahinungod sa tanang tawo” (1 Tim. 2:1).  Bisan ug patay na ang atong igsoon  nagpabilin gihapon silang tawo, mao nga ang kasulatan nag-ingon man usab nga dili kita malimut sa atong pagka-manggihatagon sa mga buhi apan dili nato hilakalimtan ang paghandom sa mga patay (cf. Sirac 7:33).

Ang Pag-ampo sa mga minatay usa sa labing dako nga buhat sa atong gugma. Ang kalooy ni Ginoong Jesukristo nilokop sa tanang katawhan, ug siya nagatinguha sa kaluwasan sa tanan busa kita nagasangpit kaniya uban sa dakong paglaom nga   pinaagi sa atong mga pag-ampo kalooy-an niya ang atong mga kaigsoonan nga nangamatay.

Ang Pag-ampo sa mga minatay dili gayud mahatagan ug lisod nga mga pagsabot, kini atong mapamatud-an gayud diha sa Balaang Kasulatan. Ang uban supak niining  Doktrina sa Simbahang Katoliko nga mao ang pag-ampo sa mga minatay. Apan kini nga pagtulun-an dayag kining gitudlo diha sa Bibliya ug dili kini usa ka tinumutumo lamang nga pagtulun-an sama diha sa Daang tugon sa 2 Macabeo 12: 35-46. Si Judas Macabeo nagpaamot ug 2,000 ka salapi nga plata aron ihalad alang sa mga pag-ampo sa mga tawo nga namatay  sa gubat tungod nagtoo siya sa pagka-banhaw. Kung wala pa siya motuo nga ang patay mabanhaw usa unta ka butang nga binuang ug walay kapuslanan ang pag-ampo alang kanila nga nangamatay. Niining malig-on ug Diosnon nga huna-huna, nga ang tanang minatay makalingkawas sa sala.

Busa diha sa Balaang Kasulatan ang mga magtotoo nag-ampo gayud sa ilang mga kaigsonan nga nangamatay diin kini gitamod na kaniadto. Bisan ug wala pa magpakatawo ang atong Ginoong Jesukristo kostumbre na sa mga unang katawhan sa Dios ang pag-ampo sa mga minatay ug gani sa pag-abot ni Ginoong Jesukristo iya kining gisunod  nga pagtulun-an sa pag-ampo sa minatay sa dihang namatay iyang suod nga higala nga si Lazaru siya miduaw “natandog nausab ang kasing-kasing ni Jesus ug miadto siya sa lubong usa kini ka langob ug ang pultahan niini gialihag bato, kuhaa ninyo ang bato  misugo si Jesus, si Marta ang igsoon sa namatay miingon Ginoo baho na siya karon kay upat naman ka adlaw nga gilubong siya ug si Jesus miingon wala ko ba ikaw sultihi nga Makita mo ang himaya sa Dios kong motuo ka? Unya mihangad si Jesus ug miingon Amahan nagpasalamat ako kanimo nga namati ka kanako nasayod ako nga kanunay kang mamati kanako, tungod niining mga tawo nga ania dinhi aron sila motuo nga ikaw maoy nagpadala kanako, ug human niya isulti kini misinggit siyag kusog Lazaru gula ngari! Busa migula ang minatay nga binugkosan ug panapton ang iyang mga kamot ug tiil, badbari ninyo siya ug palakta giingnan sila ni Jesus” (Juan 11: 38-44).