Luyo sa tanang kalisod, adunay Ginoo sa atong taliwala

Human sa 20 ka tuig niyang pag-pangalagad isip pari, mao usab ang pag-abot sa mga pagsulay—kapila nagbalik-balik sa ICU, hangtud nakahuna-huna siya nga maayo pag mamatay na lang kaysa mag-antus sa balatian.

Kini ang mga kasinatian sa Spiritual Director sa Archdiocesan Service Committee-Catholic Charismatic Renewal Services of Davao (ASC-CCRD) nga si Fr. Hover Jocson nga iyang gi-saysay sa mga tawo sa Misa nga iyang gisaulog panahon sa kapistahan sa Kristong Hari, Nobyembre 23, didto sa Christ the King Center sa Bago Aplaya, Davao City.

Bisan pa man sa iyang kasinatian, sa panahon nga mi-surrender na siya tungod sa kasakit ug kakapoy unya gihalad na niya sa Ginoo ang tanan niyang pag-antus, didto na nagsugod ang paghinay-hinay og nibalik siya sa iyang kahimtang sa wala pa miabot ang mga balatian.
“Siya ang nag-ayo sa akong balatian. Siya ang nagbalik kanako sa akong ministriya,” sumala ni Fr. Jocson.

“Ang Ginoo nagtan-aw sa atong kinabuhi. Kung mu-reklamo ta sa kakapoy ug kalisud, anaa ang Ginoo ug at least buhi ta,” dugang niya.
Giingon usab niya nga sa panahon nga ang tawo naga-reklamo, ang Ginoo naglihok na. Naningkamot na usab ang Ginoo nga ihatag ang panginahanglan—spiritual man o physical.

“Ang Ginoo nagtawag kanato nga mu-surrender kita sa ato kinabuhi niya,” ingon ni Fr. Jocson nga nakabalik lamang sa pag-misa kauban ang grupo human sa 10 ka bulan nga pag-antus sa iyang sakit sa kidney ug diabetes.

Sa iyang pagtapos sa iyang homiliya, giingon niya nga ang kalipay sa kinabuhi masinati lang kung musurender ang matag usa sa Ginoo ug kung ang Dios magpabiling hari sa kasing-kasing sa tawo.

PAGPASABOT SA EYUKARISTIYA

Sa tibuok adlaw nga selebrasyon sa Solemnidad sa Kristong Hari, gihimo usab ang pagpasabot sa mga miyembro sa ASC-CCRD mahitungod sa Eyukaristiya pinaagi sa pagpaambit ni Bro. Henry Evangelista sa Oasis of Love.

Ginamit ang texto sa Catechism of the Catholic Church ug texto sa Bibliya, gipalawom ni Bro. Henry ang mga pagsabot mahitungod sa Katolikong pagtoo ilabi na sa Eyukaristiya.

Gihimo usab ang healing session alang sa mga miyembro nga gipangulohan sa healing ministry kauban si Fr. Hover Jocson. (@johnfrancesf)

No Comments

Post A Comment