Pope Francis – “Lowly but Chosen”

Mao ni ang hubad ngadto sa English sa motto (Miserando atque Eligendo) ni Papa Francisco, kinsa pila na kaadlaw atong nakita, nadungog ug nahikap, nasinati nga “close up and personal” dinhi sa Pilipinas. Nakita gayud nato nga ang gipili sa Ginoo nga atong Santo Papa karong panahona, mapaubsanon ug mabination gayud sa katawhan ilabi na ngadto sa labing ubos sa katilingban.

Karong adlawa maoy Grand Celebration sa Rizal Park – panagtigom sa mga anak sa Diyos, ma katoliko man o dili, nagatoo man sa Diyos o dugay nang misalikway Kaniya, kinsa nakabati, nakakita, natandog sa ilang kasingkasing sa gugma ug kalooy sa Diyos pinaagi ni Papa Francisco. Bisan ang milyon ka milyon ka mga tawo nga pinaagi lamang sa Telebsiyon nakasinati niini, apan tinuod lang gihapon ang ilang kasinatian, nga Diyos lamang ang makamao ug dunay igong gahom sa paghimo.

Bisan ako nga kapila naman nakaduol kang Papa Francisco sa lainlaing higayon kaniadto, natandog gayud kaayo sa iyang pakigtagbo sa katawhan. Lahi karon, kay nia na gayud siya uban kanato, sa atong yutang natawhan kinsa giuhaw ug gigutom sa tiunay nga kalingkawasan, kalipay ug kalinaw sa Ebanghelyo nga gisangayw ug gipuy-an, gisaksihan.

Nadasig unta kitang tanan sa iyang mga pahimangno ug paghagit. Ang iyang balaang presensya nakapukaw unta sa atong mga naghikatulog nga mga tanlag ug kaluya. Ang iyang pagduaw nagpamatuod unta alang kanatong mga Katoliko ug sa ubang mga katawhan nga ang Ebanghelyo ni Kristo, tinuod gayud nga kaluwasan ug kinabuhi alang sa tanan, nga angayng buhion ug ipaambit alang sa kaayuhan sa tanan.

Bisan dili tinuyuan tingali sa mga nagpahigayon niining maong pagduaw, apan dako kaayo nga ikatabang kini sa atong padayon nga pagpangandam sa ika-500 nga kasumaran sa pagsugod sa pagtoo kang Kristo diri sa Pilipinas, ilabi na nga karong tuiga maoy Tuig sa mga Kabus. Sakto gayud kaayo ang tema sa maong pagbisita – Kalooy ug Duyogkasakit. Magmabungahon unta kining pagduaw ni Papa Francisco sa atong mas mainiton pa ug madasigon pa nga pagpakabana, pagtakad ug pakiglambigit ngadto sa labing mga nanginahanglan ug nabiyaan, ug labing naalaot sa atong sosyodad.

40 anyos na ang atong Alay Kapwa Lenten Campaign karong tuiga. Dili ba maayong paagi sa pagpadayag sa bunga sa atong kasinatian uban sa atong Santo Papa Francisco nga mag tininuod kita nga moapil ug mosuporta karon sa Alay Kapwa 2015 February 18 – March 29.

Saktong panahon na, nga ayohon na nato ang pagorganisa sa atong ministriya sa Kalooy ug Duyogkasakit diha sa tanang hut-ong sa Simbahan, pinasikad sa gimando niadtong panahon pa ni Papa Benedkto XVI ug sa pagpamatuod pa gayud sa Simbahan sa mga Kabus nga gitinguha natong mapuy-an sukad pa kaniadto sumala sa PCP II.

No Comments

Post A Comment