80 ka paresan midawat sa Sakramento sa kaminyoon sa Malabog Parish

80 ka paresan ang midawat sa sakramento sa kaminyoon sa gipahigayong kasalan ng parokya sa adlaw sa mga kasing-kasing, Pebrero 14 sa parokya sa Malabog.

Sa paningkamot sa parokya nga makadawat ang mga paresan nga nagpuyo-puyo sa sulod sa pila ka tuig ug wala makadawat sa sakramento, nakig-alayon ang San Roque Parish, Malabog sa Barangay ug sa City Government of Davao aron maproseso ang mga papeles nila nga libre.

Sumala ni Fr. Jemasol Ortiz, gituyo nila nga himoon ang kasalan mismo sa adlaw sa mga kasing-kasing aron mas dali mahinumdoman sa mga bag-ong magtiayon ang ilang anibersaryo sa kasal.

Si Bebs Labtic, 40, ug si Marvic Labtic, 27, adunay duha na ka anak ug nag-ipon sulod sa unom ka tuig ug gikalipay nila pag-ayo nga nadawat nila ang sakramento sa kaminyoon niadtong adlawa.

Sumala ni Bebs, gusto nila nga makadawat sila sa bendisyon sa Ginoo mao naningkamot sila nga makasal ug aron usab mapahimutang ang mga papeles sa ilang mga anak.

Dugang pa nila nga babag sa kadaghanan ang pagpakasal sa simbahan tungod sa gastos sa pagproseso ug kahasol sa pag-balik-balik sa syudad.

Giingon usab nila nga dako ang natabang sa gihimo sa parokya ug sa local government aron madawat nila ang sakramento. Dili na pud kaayo dako ang ilang gigasto sa tibuok selebrasyon tungod gihimo nilang simple ang pagsaulog kauban ang ilang pamilya ug mga higala.

Gisugdan ang pagpangandam sa parokya sukad niadtong Oktubre 2014 ug gikalipay sa tanan nga napahigayon ang maong selebrasyon alang sa kaminyoon sa 80 ka mga paresan sa Malabog.

No Comments

Post A Comment