Pagpaambit sa mga Pulong ni Papa Francisco (Mati Newsbits)

Pagpaambit sa mga Pulong ni Papa Francisco –  Gipakopya sa buhatan pastoral sa San Nicolas de Tolentino Cathedral sa Mati ang completong  texto sa tanang mga mensahe/homiliya ni Papa Francisco sa iyang tulo ka adlaw nga aktibong pagbisita sa managlahing mga dapit sa Manila ug Leyte—Manila Cathedral, UST, Mall of Asia Arena, Tacloban, ug Quirino Grandstand, ubp alang sa tanan nga interesado sa pagbasa ug pagpaambit usab kabahin niini.  Kini ang gihimo ni Angelito “Liklik” Aumada, kaabag coordinator sa Cathedral parish aron ang si bisan kinsa mang nag-alagad sa simbahan ug sa natad sibil ug sibiko lakip ang media ang makabalik-lantaw sa mga pulong sa Sto. Papa  ug makahatag og kinabuhi niini, labi na sa pagpalig-on sa pagtuo ugmga relasyon diha sa pamilya ug matag GKK, ug sa pag-alagad, pagtabang ug paghigugma gayud sa mga kabus ug timawa. Mahimo usab nga ma-trace up ang mga pulong sa Sto. Papa sa internet.  

Mga Reaksyon sa Probinsya – “Usa ka daku nga gasa ug grasya ang pagbisita ni Pope Francis dinhi sa nasud nga naghatag og dakong inspirasyon sa mga pagpaningkamot sa pagpakabuhi nga matarong taliwa sa kalisod nga masinati.” Kini ang giluwatan ni District 2 Congresswoman Thelma Z. Almario sa pagpasabot nga haom lamang usab nga makita sa Santo Papa ang mga biktima sa kalamidad sa Leyte samtang ang iyang karismatikong presensiya ang magsilbi nga tima-an sa mensahe sa Dios sa “Mercy and Compassion” nga mohatud usab og kalinaw diha sa panagdait sa matag usa. Magsilbi usab unta nga panig-ingnan ang iyahang ka-simple alang sa katawhan, ug ang kagustuhan niya nga makigsandurot gayod sa mga yanong tawo. 

Sa laing bahin, si Gov. Corazon Malanyaon  nagpadayag sa iyang mga sakop sa panggamhanang probinsyal kabahin sa panginahanglan ug dakong gahum sa spiritualidad nga maoy iyang gipangandoy sa matang sa liderato sa probinsya, una sa iya mismong istilo “aron mapalig-on gayud ang dugang kalambuan sa probinsya, labi na alang sa mga nabiktima sa Bagyong Pablo, ug makab-ot ang ‘God-centered dreams inspired by the Pope’s visit’” .  Giawhag niya ang mga kawani nga “mosalig ka sa mga maayong sangpotanan sa imong gihimo, ug dili kini ihikaw kanimo” aron matuman gayud ang kahiusahan sa “building back better” ning tuig 2015 sa Baganga, Cateel ug Boston…ug sa kinatibuk-ang probinsya. (Sr. Marietta Alo, OND)

No Comments

Post A Comment