Skills training gilunsad sa Maa parish

Gilunsad sa St. Francis of Assisi Parish sa Maa, Davao City ang skills training alang sa mga parokyano kauban ang mga ahensya sa gobyerno.

Niadtong Pebrero 15, gihimo ang orientation mahitungod sa skills training sa St. Claire Hall sa parokya kauban ang Technical Education Skills Development Authority (TESDA), Department of Labor and Employment (DOLE) ug City Government of Davao.

Gatusan ka mga parokyano ug mga dili parokyano ang misalmot sa maong orientation ug nagpa-enroll sa nagkalain-laing kurso sama sa Food Processing, Bread and Pastries, Cookery, Welding, Carpentry, Masonry, Plumbing, Painting (construction building), Automotive, Motorcycle Repair, Electrical Installation and Maintenance, Refrigeration and Air Conditioner Repair, Computer Hardware Servicing, Electronic, Hairdressing (male and female), Beauty Care, ug Agriculture-Organic Farming.

Gipaminaw usab nila ang mga unang nakasalmot sa maong skills training niadtong milabay’ng tuig nga karon nakapundar na sa ilang kaugalingong livelihood kon negosyo.

Ang ilang training pagahimoon matag domingo alas 8 sa buntag hangtud alas 5 sa hapon ug muabot kini sa unom ka bulan una sila hatagan og certificate of training gikan sa TESDA ug hatagan usab sila ug starter kit gikan sa DOLE aron makasugod na sila sa ilang bag-ong livelihood.

Sumala ni Fr. Emmanuel Gonzaga, parish priest, ang pag-asenso sa mga muapil sa skills training nagdepende sa ilang paglahutay ug pagtuon aron magamit nila sa umaabot nga panahon ang ilang natun-an aron sa ilang panginabuhian.

No Comments

Post A Comment