Balikan ta ang Pito ka mga Buhat sa Kalooy

ANG tibuok Simbahan, karong Dominggoha nagasaulog sa Dominggo sa Diosnong Kalooy. Gipangandaman kini sukad pa sa Biyernes Santo, pinaagi sa the Divine Mercy novena of Chaplets nga dunay partikular nga pahanungdan sa matag adlaw.

Karong adlawa, ang mga Kaparian nagahatag ug maayong katekesis diha sa ilang mga pagsangyaw bahin sa Diosnong Kalooy. Sila ang gisangunan sa Ginoo nga mohatag og katin-awan ug pag-awhag sa mga magtotoo nga magmadawaton ug mapasalamaton sa Diosnong Kalooy. Maga-awhag sila sa katawhan nga magmaloloy-on sama nga ang Dios maloloy-on.

Si San Juan Pablo II nga Santo Papa nato kaniadto maoy naghukom niadtong tuig 2000 nga himoon ang ika-2 Dominggo sa Pagkabanhaw—Dominggo sa Diosnong Kalooy. Aron sa paghatag og dakong importansya sa maong kasaulogan, giapil niya ang paghatag sa Ildulhensiya Plenarya. Mao kini ang talagsaong gasa sa Dios pinaagi sa Simbahan diin ang tanang sala sa tawo pasayloon, lakip usab ang kapasayloan sa tanang silot nga bunga sa maong mga sala. Pagkadako kini nga kahigayunan alang sa mga makasasala nga nagatinguha pa sa kaluwasan ug kalingkawasan.

Adunay mga kondisyon ang pagkab-ot sa Ildulhensiya Plenaria. Ang una mao ang pagkompisal sa mga sala sa maong Dominggo sa Kalooy o sa mga adlaw duol niini. Ang ikaduha, mao ang pagapil sa Santos nga Misa ug mangalawat. Ang ikatulo, mao ang pag-ampo alang sa mga katuyuan sa Santo Papa pinaagi sa pag-ampo sa usa ka Amahan namo, Maghimaya ka Maria, ug Himaya sa Amahan.

Apan, ang labing dakong bahin sa kapistahan sa Diosnong Kalooy nga makapahimuot sa Dios, mao ang paghimo og buhat sa kalooy nianang adlawa. Ang mga buhat sa kalooy maoy labing mahinungdanong kalihokan sa Dominggo sa Diosnong Kalooy. Ang mga pulong sa kalooy ug mga pag-ampo sa kalooy dili igo kon dili kini magdala kanato sa paghimo gayud sa mga buhat sa kalooy. Maayo man ang tinagsa nga paghimo niini apan labi pang mapuslanon ug mabungahon kon himoon kini sa mas organisadong paagi-sa katilingbanong paagi.

Busa, mahinungdanon kaayo nga balikan ta ang karaan nga tradisyon sa Simbahan, nga daw karon, wala na kaayo ginahisgutan ug gituman ang Pito ka mga Buhat sa Kalooy. Mga konkretong paagi kini sa pagpadayag sa pagtoo ug gugma alang sa Dios pinaagi sa paghigugma sa isigkatawo. Ang una, ang pagpakaon sa mga gigutom. Ikaduha, ang pagpainom sa mga giuhaw. Ikatulo, ang pagbisita sa mga hubo. Ikaupat, ang pagpabalay sa mga walay kapuy-an. Ikalima, ang pagbisita sa mga masakiton. Ikaunom, ang pagbisita sa mga binilanggo. Ikapito, ang paglubong sa mga patay.

Kining mga buhat sa kalooy nagatubag sa Pisikal ug materyal nga panginahanglan sa tawo. Gidasig kini gikan sa Mt. 25:31-46 diin gipadayag ang sukdanan sa katapusang paghukom. Niining Tuig sa mga Kabus, mapuslanon kaayo alang sa matag Katoliko ug Kristohanong Katilingban nga pahingusgan pa gayud ang paghatag ug katumanan sa maong mga buhat sa kalooy. Sa ingon niini, labi pang makita ug mabati kining kinaiya ug hulagway sa mahigumaong Simbahan aron siya mahimong tinuod ug nagtininuod nga Maayong Balita alang sa kalibutan.