Ang Kalipay sa Pakighinagbo sa Uban

SA miaging semana, tua ko sa habagatang bahin sa diyosesis, didto sa layong lungsod sa Jose Abad Santos, sa Barangay Camalian, GKK – Inahan sa Kanunayng Panabang. Sa pag-abot na namo sa purok abutanan, wala madugay nadungog nako ang tingog sa usa ka bata nga nag-ingon, “Maayong buntag, Father!”

Ug sa akong paglingi ngadto kon hain gikan ang tingog, tua ang batang babaye, nagkaway-kaway sa iyang kamot, nagpahiyom ug malipayon uban sa iyang inahan.

Uban ni Fr. Ritchie Cuaton, CssR, Nuing Mission in-charge, akong giduol sila ug nagbless ang bata, ug gipangutana nako kinsay iyang ngalan. Walay pagduhaduha ug kaulaw, mitubag siya, “Danicar.”

Ang babaye nga iyang katapad mao diay ang iyang mama, nga si Arlene delos Reyes, kinsa malipayon usab nga nagtimbaya uban sa iyang bana si Dennis, sa akong unang pagbisita sa ilang dapit. Si Danicar na dayon ang nagdala kanamo sa usa ka payag sa unahan, daplin sa baybayon. Didto, nagsige na siya’g istorya. Gipaila-ila ko niya sa iyang itoy nga si Eddie. Gipakita ko niya sa lawak tuluganan. Basta, siya nay receptionist namo.

Pagkahuman gidala na usab ako niya sa baybayon ug naglantaw kami sa mga dagkong balod. Gisaysay niya nga sayo sa buntag nangaligo sila sa dagat kauban sa iyang Ate Tonton.

Hangtod sa among pagpanguli, mao ra gihapon ang iyang gipakita nga pagtagad, pagsalig, pag-abiabi. “Babay na Danicar, adto nami!” Samtang nanamilit, akong gibati ang dakong kalipay nga nakahimamat ko sa usa ka bata nga ingon ni Danicar, balon ang nasaksihan nako kaniya uban sa iyang pamilya nga madinaiton, malipayon, gawasnon nga makighunagbo ug modawat og mga bisita sa ilang banay.

Sa iyang mensahe alang sa pagsaulog sa ika-49 nga Adlaw sa Komunikasyon sa tibuok Kalibutan, si Papa Francisco mihatag og dakong bili sa pamilya nga, matud pa niya, maoy unang luna diin makat-on ang tawo sa pakiglambigit sa uban ug sa Dios pinaagi sa pag-ampo. Miingon siya nga ang usa natong kinahanglan tun-an karon, taliwala sa bag-o ug “hi-tek” nga mga himan sa komunikasyon, mao ang pagistoryahanay sa usag usa. Tinuod kaayo kini ilabi na sa atong mga kabatan-onan nga maayo kaayo sa modernong media.

Ang bag-ong media karon nagpabungol kanato, kay gipuno niya’g saba ug kasamok ang mga luna alang unta sa kahilom aron makapaminaw ug magpaminaway kita. Ang nagakahitabo mao nga nagmenos hinoon ang pag ilhanay ug pagsinabtanay tali sa mga tawo ilabi na diha sa pamilya.

Ang modernong media motabang unta sa pagpadali sa pagpakabana ug paglambigitay alang sa pagbinayloay sa atong mga istorya. Makatabang unta kini sa makahuluganong panagtagbo sa mga tawo bisan lagyo sa usag usa ang puluy-anan. Makatabang unta kini sa pagkab-ot sa dugang kahusay ug kalinaw.

Hain man makat-on ang tawo sa samang pagistoryahanay? Niining Dominggo sa Komunikasyon, nagpahinundum ang Santo Papa nga diha sa pamilya unang makat-on ang tawo sa gawasnon, masaligon, matinahuron ug makahuluganong pagpadayag ug pagistoryahanay. Kini ang komunikasyon nga nagapadangat og panalangin imbis nga kadaot ug kaalaot. Kini mao ang klase sa komunikasyon nga magpatunhay sa kaayo ug katarong sa tawo ngadto sa iyang isigkatawo.

Si Danicar, akong bag-ong higala, nagpamatuod niining giingon sa Santo Papa. Dayag kayo nako ug nasaksihan ang maayo kaayong relasyon sa mga tawo nga naa sa palibot ni Danicar, ilabi na ang iyang kasuod ug kahiusa sa iyang mga ginikanan. Tungod niini, naingon niadto ang iyang pakigtagbo kanamo. Sa pamilya gayud kini natural nga iyang natun-an ug namat-an.

Si Papa Francisco nagkanayon, “ang bata nga nakat-on sa pamilya sa pagpaminaw ngadto sa uban, nga matinahuron sa uban, mahimong kusog alang sa dialogo ug pakig-uli ngadto sa uban.”

Salamat kanimo Danicar, sa higayon nga makaila ka, sa higayon nga nagkahimamatay kita. Bisan kadali ra, apan undanon, ug makahuluganon ang atong panagtagbo. Nagpalig-on sa pasalamat sa gasa sa pamilya. Sa kamapusalanon sa mga gagmayng butang apan dako’g bili kay hinatag sa mahigugmaon sa tanan. Hinaot unta ikaw Danicar mopadayon sa pagtubo sa panuigon, sa kinaadman, sa grasya ug sa kusog uban ni Papa Dennis ug Mama Arlene ug sa imong Ate Tonton.

Ug ako usab, mopadayon pud nga mohamtong ug mag-edaran nga pakabililhon ang kaakuhan ug tahas sa pamilya alang sa pagkab-ot sa kaayuhan ug kalamboan sa tanan.

No Comments

Post A Comment