PSL Davao

KSP-PSL sa Artsidiyosesis sa Davao 50 anyos na

PSL Davao

KARONG tuiga gisaulog sa atong Artsidiyosesis ang ika-50 nga kasumaran o anibersaryo sa Kasaulogan sa Pulong (KSP) uban sa ministriya sa Pangulo Sa Liturhiya (PSL) ubos sa tema “Kasaulogan Sa Pulong – Pangulo sa Liturhiya, 50 anyos na.”

Kining maong kaugdahan gisugdan ni Fr. Andre Pigeon, PME, niadtong tuig 1965 sa katilingban sa Tuban, Sta. Cruz, Davao del Sur nga sakop sa parokya sa St. Joseph the Worker ubos sa pagdumala sa kanhi Kura Paroko, Fr. Claude Matte, PME.

Sumala pa, gisugdan kining maong kalihukan agi’g tubag sa hagit sa Konsilyo Batikano II aron nga ang kabuhong sa Balaang Kasulatan maablihan ngadto sa tanang katawhan dili lamang sulod sa kasaulogan sa Misa, apan sa bisan unsang matang sa panagtigom sa katawhan matag Domingo sa higayon nga dili masaulog ang Santos nga Misa.

Ang kasaysayan nagtug-an nga ang Kasaulogan Sa Pulong, nga nailhan nato nga KSP maoy nahimong sinugdanan sa kamugnaan, paglig-on ug paglambo sa atong mga Kristohanong Katilingban nga maoy duso sa atong simbahan sa Davao ug sa tibook Mindanao sukad pa niadtong dekada ‘70.

Ang ministriya sa Pangulo Sa Liturhiya, kanhi gitawag nga KSP Lider, nga maoy gitahasan nga mangulo sa KSP nahimong nag-unang ministriya sa GKK.

Sa kasamtangan ang Archdiocesan Liturgical Center (ALC) maoy gitahasan nga magpahigayon, magpadagan ug magdumala ning tuig sa pagsaulog ubos sa Steering Committee nga gipangunahan sa ALC Director, Fr. Joel Caasi, Archdiocesan PSL Coordinator, Loloy Genosas ug pipila ka parish PSL Coordinators uban sa laing pinili nga indibidwal.

Kabahin sa usa ka tuig nga kalihukan mao ang “Panagtagbo sa Bikaryato”, usa ka okasyon kun diin ang mga PSL sa usa ka bahin sa Simbahan sa Davao nga gitawag og “vicariate” ug gilangkoban sa pipila ka mga parokya magkahimamatay, magka-ilhanay ug magpalawom sa ilang kasinatian ingon nga mga pangulo sa pagsimba sa ilang tagsa-tagsa nga katilingban pinaagi sa Santos nga Misa, mga “parlor games”, “group sharing” ug “fellowship meal.”

PANAGTAGBO SA BIKARYATO

Niadtong Abril 25 ning tuiga, gisugdan ang panagtagbo sa bikaryato sa San Pedro nga gipahigayon sa Parokya sa St. Mary’s of the Perpetual Rosary Parish sa Buhangin, gisundan sa Bikaryato sa Sacred Heart nga gipahigayon sa Parokya sa Sacred Heart, Calinan, sunod sa Bikaryato sa St. James nga gihimo sa Parokya sa San Juan, Lasang, ug dili pa lamang dugay, niadtong Sabado, Hunyo 6 sa Bikariyato sa Santo Rosario nga gipahigayon sa Parokya sa Sto. Rosario, Toril nga giapilan sa kapin kun kulang 250 ka mga PSL.

Uban pang mga kalihukan nga kabahin sa pagsaulog sa mao ang pagpasidungog sa mga outstanding PSL sa matag parokya, ang Agosto 29 nga pilgrimage ngadto sa kapilya sa Tuban, Sta.Cruz, Davao del Sur kun diin didto nagsugod ang kaugdahan sa Kasaulogan Sa Pulong, ug ang panagtigom sa tanang mga PSL sa umaabot nga Nobyembre.

Mabasa usab nato dinhi ang kasaysayan sa KSP-PSL sa sunod nga mga issue aron atong masabtan pag-ayo ang lintunganay ning maong kaugdahan ug ang dakung nahimo niini diha sa pagpalawom sa pagtoo sa katawhan sa Dios diha sa mga GKK ug ang paglambo usab sa GKK dinhi ning bahin sa Simbahan.

No Comments

Post A Comment