Maayong pagsugod sa SY 2015-2016

Nakasugod na ang atong mga tulunghaan. Ang atong mga estudyante hinayhinay nang nagpahiluna sa ilang kaugalingon sa ilang mga schedule ug mga lawak tigumanan. Ang mga tigdumala ug mga magtutudlo sa tulunghan nakapangandam na, bisan taliwala sa mga kalisdanan ug kakulangan. Malipayon ug malaumon lang gihapon motimbaya sa mga bag-ong estudyante ug magkita pagusab sa mga daan nga estudyante.

Kaninyong tanan dawata ang akong mainitong pagtimbaya, sa ngalan sa atong Ginoong Hesu Kristo, uban sa panalangin alang kaninyong tanan nga ang Dios Amahan sa langit magabuhagay kaninyo sa mga grasya nga inyong kinahanglan, pinaagi sa lamdag ug giya sa Dios Spirito Santo, alang sa malampusong pagtuon karong tuiga.

Sakramento sa panaghiusa ug gugma

Gisaulog nato ang Solemnidad sa Lawas ug Dugo ni Kristo sa miaging Dominggo. Gawas sa matag Dominggo nga pagsaulog, naa pa gayud kining espesyal nga tinuig nga pagsaulog. Unsa ang nahimong bunga niining Yukaristiya sa atong kinabuhi?

Daghan pa gihapon ang nagakalawat sa Misa labi na sa Dominggo. Salamat sa Dios! Sa solemnidad niya sa miaging Dominggo, giprosesyon pa nato ang Yukaristiya. Naa pa gani pipila ka mga Kapilya sa Gkk nga nagasaulog sa Pulong inubanan sa pagpakalawat. Unya, human niini, unsa man ang nahitabo? Unsay epekto sa mga nangalawat?

Ang usa ka dayag nga kahimtang mao nga mas daghan pang mga Katoliko, (kapin sa katunga), nga wala nagasaulog sa Yukaristiya ug nangalawat, ni sa Kasaulogan sa Pulong sa Dominggo (may pakalawat o wala), kay sa niadtong nagahimo niini. Lantawa ang gidaghanon sa mga nagasaulog sa Misa sa adlaw sa semana diha sa poblacion? Gamay ra kaayo.

Sa ato pa, ang katilingban sa mga tinun-an ni Kristo nga maoybmga sakop sa Simbahan wala pa mahingpit ang panaghiusa. Panaghiusa ngadto sa Dos ug isigkatawo. Mao nga diha sa Misa, naga-ampo kita, “Patalinghugi Amahan, nga kami nga nangalawat sa Lawas ug Dugo ni Kristo mahiusa sa Espiritu Santo.” “…mapuno unta kami sa gugma uban ni Francisco among Papa, uban ni Guillermo among Obispo, ug sa tanang mga pari.”

Ang kahiusahan sa mga magtotoo anaa gitugyan sa lihok sa Sprito Santo, ug sa mga gigamhan Niya, nga mao unang mahiusa, aron mahimong Iyang mga insturmento ug saksi sa kahiusahan ug gugma — ang Santo Papa, ang Obispo, ug mga Pari.

Igo na ba ang Pagtugyan sa Putling Kasingkasing ni Maria?

Niadtong Hunyo 13, ang tibuok nasud nagbag-o sa pagtuygyan sa katawhan ngadto sa Putling Kasingkasing ni Maria. Mapuslanon ug mahinungdanon kaayo ni nga buhat matag tuig nga ginahimo nato sa Simbahan. Ang atong katawhan ug mga namunuan sa nagkalinlaing sektor nagatubang og mga bug-at nga mga hagit ug hulga. Ang atong pagdangop sa atong mahal nga Inahan aron tabangan kita niya sa iyang mga panagmuyo ngadto sa iyang Anak nga si Hesus.

Angay natong hinumduman nga ang maong buhat sa pagtugyan kulang kaayo kung kini dili ubanan sa atong pagbuhat sa atong bahin nga walay lain kon dili ang pagtuman sa tagsatagsa natong buluhaton ug kaakuhan. Ug buhaton nato kini sa paagi sama kang Maria.

Sama sa iyang pag-uyon sa pagbuhat sa angay buhaton sumala sa pagbuot sa Dios. Ilhon nato nga ang atong mga kaakuhan kabahin sa pagbuot sa Dios alang sa pagpatunhay ug pagpalambo ug pagayo sa kinabuhi, sa kinabuhi sa tanan.

Labaw pa sa suhol, labaw pa sa dungog, labaw pa sa pasidungog ug bisan unsang ganti, nagatuman kita sa pagbuot sa Dios alang kanato, karon ug diri sa atong kahimtang, tungod sa atong pagtoo ug pagmahal sa Dios ug sa atong isigkatawo.

No Comments

Post A Comment