Pagtugyan sa Putling Kasingkasing ni Maria

NIADTONG Enero tuig 2013, ang Catholic Bishops Conference of the Philippines (CBCP), sa pagsugod sa siyam ka tuig nga pagpangandam alang sa dakong hubileyo sa 2021, naghukom sa paghimo sa hiniusang pagtugyan sa atong nasud ngadto sa Putling Kasingkasing ni Maria (PKM), matag tuig sa iyang kapistahan.

Karong tuiga ang iyang kapistahan nahulog sa Sabado, Hunyo 13, 2015. Busa sa ikatulong higayon, sa tanang mga simbahan, shrines, sanctuario maghiusa ang tanan sa paghimo niini pinanguluhan sa mga Obispo ug mga Kaparian.

Human niini ipadayon nato ang pagpakaylap sa debosyon sa reparasyon panahon sa lima ka unang Sabado matag bulan, nga gipadayag sa Mahal nga Birheng Maria pinaagi ni Sr. Lucia nga mao kuno ang pagbuot sa iyang Anak nga si Jesus.

Niining adalawa himoon ang mosunod: 1) ihalad ang tibuok adlaw isip reparasyon, 2) mangompisal, 3) magmisa ug mokalawat, 4) magrosaryo, 5) mamalandong, og 15 minutos sa mga misteryo sa rosaryo.

Niining tinuig nga pagbag-o sa nasudnong pagtugyan ngadto sa PKM, gipanghinaot natong tanan, nga ang atong gipaningkamutan nga kausaban ug kalambuan sa pagtoo dinhi sa Pilipinas, ubanan unta kanunay sa mga pangaliyupo sa atong Mahal nga Inahan sa langit aron sa ingon magbunga og nabag-ong Simbahan ug nabag-ong sosyodad diin maghari ang kamatuoran, kaangayan, gugma ug kagawasan.

Gawasnon na, apan kulang pa

Usa ka gatos ug napulog pito (117) na ka tuig kitang gawasnon gikan sa panggamhanang banyaga—Espanyol, Amerikano, ug Hapon. Dugay na kaayo. Kita man gani ang unang nakaangkon niining kagawasan dinhi sa rehiyon sa Asia. Salamat ngadto sa mga Bayani kaniadto, kansang kinaadman, kaisog, ug sakripisyo sa kinabuhi nga gitugyan alang sa gimithing kagawasan. Salamat usab sa tanan nga nanlimbasog aron ipausbaw pa ang kagawasan niadtong mga katuigan nga milabay, sila nga mga gagmay ug dagkong Bayani.

Ang usa niining mga Bayani mao si Apolinario Mabini. Bisan og paralitiko siya, dako siya’g natampo sa pakigbisog alang sa kagawasan pinaagi sa iyang kinaadman mahitungod sa kasaysayan, politika ug kahimtang sa katawhan sa ilang panahon kaniadto.

Usa niining mga hunahuna nga gitampo ni Apolinario Mabini mao ang iyang giingon mahitungod sa kagawasan sa nasud. Dili kuno igo lamang nga makab-ot ang kagawasan. Kinahanglan ang pagpahiluna og kaggamhanan nga matarong. Ug iya kining giklaro nga nagpasabot kini nga ang kaggamhanan matinud-anon ug dili bakakon o limbongan. Matinahurong nagatuman siya sa mga balaod ug sa gipanaaran ug mga gisaad.

Kasagaran, atong gipasanginlan ang mga politiko ug ilang mga dinastiya maoy responsable sa mga kakulangan ug pagpanamastamas sa kagawasan sa nasud. Apan ang tinuod, anaa usab sa mga lungsuranon ang responsibilidad. Kitang mga lungsuranon nga wala magpakabana ug magmatarong sa pagbag-o usab sa mga namunuan ug sa mga nangalagad sa kaggamhanan, sa mga isturktura ug pamaagi niini.

Daghan pang ayuhonon natong mga lungsuranon. Ang mga politiko dili masaligan nga silay manguna ug magpatigayon sa pagbag-o, tungod kay pabor sa ilaha ang kahimtang sa mini nga kagawasan. Daghan pa kaayo ang nagkatulog ug nagpasagad sa situwasyon. Taas pa nga panahon ang kinahanglan sa pagkab-ot sa tiunay nga nasudnong kagawasan pinasikad sa hunahuna ni Apolinario Mabini. Apan, kanus-a pa man kini natong panlimbasugan kon dili KARON NA!

No Comments

Post A Comment