Tuig alang sa Kinabuhing Hinalad Part 2

Part 1

Ania ang ika-2 nga mga grupo sa mga Relihiyoso ug Relihiyosa sa Diyosesis sa Digos:

Ang mga BENEDICTINE SISTERS OF THE EUCHARISTIC KING anaa usab nangalagad isip mga pastoral sisters sa Mary Mediatrix Cathedral Parish ug sa Diocesan Liturgical Center. Atua pud sila didto sa Sinayawan, Hagonoy nag-atiman sa ilang uma.

Salamat sa Dios nga ania na ang mga PASTORELLE SISTERS. Anaa sila nangalagad sa Divine Mercy Apostolic Center sa Sinawilan, Digos City ug sa Matti Catholic Mission District. Sila ang mga kasaligang pastoral sisters didto.

Padulong sa Bansalan gikan sa Mediatrix Cathedral, maagian ang Matti Catholic Mission District. Ang mga nagdumala niini mao sila nga mga MARIST FATHERS. Sila ang nidawat sa hagit sa hinayhinay nga pagorganisa og bag-ong parokya didto.

Mga TERESIAN DAUGHTERS OF MARY-TDM Sisters, ang nagpabilin aron magdumala sa Holy Cross of Matanao. Hapit na matapos ang ilang usa ka tuig nga selebrasyon sa ika-50 anibersaryo.

Sa Cogon, Digos City atua didto ang mga monasteryo sa mga BENEDICTINES, ang mga MISSIONARY BENEDICTINES sa St. Otillien ug ang BENEDICTINE NUNS OF THE EUCHARISTIC KING. Dugay na usab sila uban kanato. Sila ang nagasuporta sa mga lumilihok sa Simbahan pinaagi sa ilang kinabuhi sa tinago ug sa pag-ampo.

Ang mga CRUCIFIED SISTERS (CAE), mao sila ang gidapit nga magpahigayon og laing tulunghaan — duha ang ilang gitukod nga tulunghaan. Una, ang Madre Pia Notari School sa Santa Cruz ug sa Baracatan, Davao City.

Ug didto usab sa Inawayan, Santa Cruz ug sa Baracatan atua ang mga ROGATIONIST FATHERS AND BROTHERS nga nagdumala sa St.John Paul II sub Parish ug ang Rogationist Academy.

Ang mga Pari uban sa mga ilang mga Laykong misyonero sakop sa SOCIETY OF THE FOREIGN MISSION (SME) nga dating gitawag nga PME FATHERS nagapadayon sa ilang programa sa mission animation ug mission formation dini sa atong diyosesis.

Sa makausa pa, kaninyong tanan nga mga lalaki ug babaye nga tibuok kinabuhi gihalad sa Dios ug nangalagad diri sa Diyosesis sa Digos, wala ako’y igong mga pulong ikapasalamat kaninyo alang sa inyong kusog ug malahutayong pagsaksi sa pagtoo, paglaum ug paghigugma sa Dios ug sa isigkatawo. Apan hibaloi ug salig kamo nga ang akong mga pag-amppo kanunay uban kaninyo. Panalanginan unta sa Dios kanunay ang inyong mga gihaguan ug padaghanon pa unta ang inyong mga katilingban sa misyon.

No Comments

Post A Comment