Ang Balaang Sakramento: Tinubdan ug Katumanan sa Kristohanong Kinabuhi

“Christ in You, the Hope of Glory. The Eucharist, Source and Goal of the Mission” (Tema sa International Eucharistic Congress 2016)

Mao kini ang gipuy-an nga kinabuhi isip saksi sa pagpadayag sa Gugma ni Kristo sa gatusan ka mga “adorers” sa ADORACION NOCTURNA FILIPINA (ANF) gikan sa Davao, Digos Tagum ug Mati (DADITAMA) kinsa magkatapok karong Sabado, Septembre 12, 2015 sa USEP Gym.

Labaw nga gikahinaman sa mga “adorers” niini nga panagtapok mao ang pakighiusa sa selebrasyon sa umaabot nga International Eucharistic Congress 2016 kansang tema mamahimong sentro sa ilang asembliya, “The Eucharist: Source and Summit of the Life of Every Adorer.”

“Alang kanako, ang Eyukaristiya maoy tinubdan ug katumanan sa kinabuhi sa matag Kristiyano,” matud ni Sofronio Cruz, Regional President sa ANF sa DADITAMA, kinsa 58 ka tuig na nga aktibong nagpuyo isip usa ka “adorer.”

Siya midugang, “Wala nay laing labaw nga pagpadayag sa gugma ngadto sa atong Ginoong Hesukristo pinaagi sa mga pag-ampo atubangan sa Blessed Sacrament; pagsabot sa Gugma ni Kristo ug pagpuyo isip usa ka maayong Kristiyano.”

Sa Sulat ni San Pablo ngadto sa mga taga Colosas, (1:24-29), ang tema sa IEC 2016 nagtumong sa pagpadayag ngadto sa hingpit mahitungod sa Eyukaristiya, Misyon ug Kristohanong Paglaum, karon nga panahon ug sa walay katapusan, (IEC Catechesis).

Kini usab maoy hisgutan ni Fr. George Angga, atol sa rehiyonal nga panagtapok sa ANF sa Sept. 12 kinsa mopasabot sa panginahanglan sa katawhan nga makadungog sa mensahe sa paglaum diha kang HesuKristo.

“Dili matukib (ma-explain) ang akong bation sa panahon nga maka-uban nako si Kristo diha sa Blessed Sacrament panahon nga mag-vigil mi,” matud ni Josito Cambarijan, pangulo sa ANF sa Arkidayosis sa Davao, “adorer” sukad pa niadtong tuig 1996. Siya midugang, ang kalipay nga akong gibati diha sa pakighiusa kang Kristo sa bihilya (vigil) “makabuang ug sa makakita nako moingon nga duna koy lahi nga ‘glow’ sa akong panagway.”

Alang kang Cruz ug Cambarijan ug sa tanang mga “adorers” puy-an nila kini sa tibuok nilang kinabuhi ug sa walay katapusan, sama sa motto nga, “ANF Forever.”

Gawas sa pagsimba diha sa Blessed Sacrament, tumong usab sa ANF mao ang pagpakaylap sa debosyon ngadto sa tanan. Gisugdan na sa ANF nga makig-alayon sa mga Pangulo sa Liturhiya sa mga Gagmayng Kristohanong Katilingban nga magpahigayon usab ug pagbihilya sa Blessed Sacrament.

Kini maoy usa sa mga sugyot nga dad-on sa ANF Davao ngadto sa National Encounter sa kauluhan Oktubre 10,2015. Nangandam usab ang ilang pundok alang sa pagtambong sa International Eucharistic Congress sa Cebu City sa Enero 24-31, 2016.

Dinhi sa Pilipinas, gisugdan pa niadtong 1920 ang kalihukan sa komunidad sa kalalaken-an kinsa naghalad sa ilang kaugalingon sa pagsimba ug pagtu-aw kauban ni Kristo kinsa buhi diha sa Blessed Sacrament nga ginahimo matag bulan sa usa ka vigil o pagbilar. Karon, duna na silay mga sakop nga mga babaye ug kabatan-onan nga gitawag ug mga Tarsisian, gikan sa modelo nga si St. Tarsisius, usa ka 12 anyos nga acolyte sa ikatulong siglo, nga nahimong martir sa dihang gikulata sa usa ka pundok sa mga kabatan-onan, ug namatay samtang padulong siya sa prisohan aron sa paghatag ug pangalawat sa mga piniriso.

Ang pagbihilya nagsukad pa niadtong unang siglo nga gihimo sa mga ermitanyo sulod sa mga selda isip pag-reserba sa Hostiyas, diin nakighiusa sila matag adlaw ug matag gabii sa buhi nga Kristo. (Annie Libres)