Center Orgs Giawhag nga Magpakabana sa GKK

ANG pundok sa center organizations sa San Pablo Parish mitambong sa gipahigayong GKK Norms Seminar di pa lamang madugay. Tumong niini mao ang paghinumdum ug pag-awhag sa mga miyembro sa kalihukan diha sa ilang Gagmay’ng Kristohanong Katilingban (GKK). Giimbitahan sila sa kura paroko nga si Bishop George Rimando aron sila mapahinumduman nga aduna sila’y katungdanan sa ilang kaugalingong katilingban. Gipasabot sa speaker nga si Vicky Estoque nga, kitang tanan nga binunyagan sa Katoliko miyembro sa GKK ug adunay katungod ug responsibilidad sa pagpalambo niini. Kini anaa sa Artikulo 5 on Membership sa GKK Guidelines and Norms nga nagkanayon: “All persons baptized in the Catholic Church and those formally received into it residing within the GKK Community are all members of the GKK.”

Sa pagpalawom ni Bp. Rimando, “nindot tan-awon nga kita nagaserbisyo sa Parokya ug nag-ambit sa atong mga talento sa atong Ministriya, apan angay natong mahibaw-an na ang Ecclesial (katilingban) nabahin sa tulo ka pagsabot. Adunay gitawag nga Ecclesial sa Arkidayosis, pasabot mga kalihokan sa kinatibuk-an, Ecclesial sa Parokya, mga Kalihokan alang sa Parokya o simbahan, ug Ecclesial sa GKK, mga kalihokan alang sa katilingban.” Dugang pa niya, “ang center organizations nabahin sa Ecclesial sa Parokya ug Ecclesial sa GKK.” Lahi kini nga katungdanan, ug kita adunay responsibilidad nga musalmot sa kalihukan. Busa kita gi-awhag nga muambit pinaagi sa atong mga talento ug kaalam alang sa kalambuan sa atong Katilingban.” Ang Lectors and Commentators Ministry, Extra-Ordinary Communion, Divine Mercy, ug Parish Choir pipila sa mga klase sa Center Organizations. (Bernie ug Nelenor Baron)