Igsoon ko Tulubagon ko

26th Sunday in Ordinary Time

Ang tinuod nga sumusunod ug tinun-an ni Kristo mao siya nga wala naghuna-huna nga ang kaayo ug gahum sa Dios maanaa lamang kaniya. Hinoon, siya miangkon nga ang Dios nagalihok sa matag usa nga nagahimo ug maayo ngadto sa uban. Kung diin naay kaayo, tinuod nga pagtagad ug paghigugma atua gayud ang Ginoo. Ang iyang gahum makita ug masinati bisan asa ug kang bisan kinsa nga dapig sa maayo, kinabuhi ug kamatuoran. Si Jesus sa atong Ebanghelyo nagbatbat mahitungod niining butanga. Iyang gipaklaro sa iyang mga tinun-an nga ang tanan nga tinuoray’ng nagbuhat ug maayo ug migamit sa Iyang gamhanang ngalan, bisan dili uban sa ilang pundok, dili usab batok kanila. Sila nga Iyang mga disipulo, dili gayud angay nga maghuna-huna nga sila lamang ang nanag-iya sa gahum sa Ginoo sa pagbuhat ug maayo. Ang Dios wala nila gipanag-iya apan sila, sama sa tanang katawhan, gipanag-iya sa Dios.

Mga igsoon, ang maong pahimangno ni Jesus ngadto sa Iyang mga disipulo nagpahinumdum usab kanato. Sa atong kasinatian, isip mga sumusunod sa atong Ginoong Jesus. Usahay anaa ang panghunahuna nga kita lamang ang nanag-iya sa tanang gahum ug kaayo sa Dios. Kini pagpasigarbo, nan, tawhanon ra gayud kaayo! Sukwahi gayud kini sa gipadayag ni Jesus tungod kay ang gahum sa pagbuhat ug maayo, ingon man ang kaluwasan, gitanyag sa tanang katawhan.

Tungod niini, ang ikaduhang bahin sa atong Ebanghelyo naghisgot mahitungod niadtong nahimong hinungdan sa kasal-anan sa uban. Dili ba apil man sa maong kasal-anan ang paghuna-huna ug pakiglantugi nga ang Dios Manluluwas lamang sa pipila?

Karong panahona, daghang mga pundok sa magtotoo (sekta) ang nagpadayon sa pagpanudlo ug pakiglantugi nga sila lamang ug wala nay lain pa nga giluwas ni Kristo ug gihatagan ug awtoridad sa pagbuhat ug mga butang nga may kalabutan sa pagtoo sa Dios. Gani, ubay-ubay ang mitoo kanila ug nakasala, ilabi na kadtong mga simple ug sinsero sa ilang pagpangita sa kabubut-on sa Dios, apan sila nga nagpahisalaag sa mga simple adunay mas dako nga tulubagon sa Ginoo.

Ikaw ba nahimong hinungdan nga maduol sa Dios ang uban o nahimong babag sa ilang pakigrelasyon kaniya? (Rev. Fr. Rene Ribac)

No Comments

Post A Comment