Nagkahiusa sa Misyon

Giusab nako ang akong “column” dinhi sa SUGID, ang supplemento sa Davao Catholic Herald. Magpunting na lamang ako sa padayong paglawig sa atong Diyosesis subay sa giawhag karong mga panahona — ang Bag-ong Ebanghelisasyon.

Kining bag-ong titulo sa akong “column” gikutlo nako gikan sa awhag pastoral ni Papa Francisco nga “Evangelii Gaudium” num. 31. Niining bahina gihisgutan ni Papa Francisco ang kaakuhan sa Obispo labot sa pagtuman sa misyon sa Simbahan diha sa simbahang lokal nga iyang gipangulohan. Ang maong kahiusahan sa misyon gisaksihan na sa unang mga Kristiyano, sumala sa Libro sa mga Buhat sa Apostoles 4:32-35, “ang mga magtutoo nagkahiusa sa kasingkasing ug hunahuna…”

Bulan sa Bokasyon
Kining maong kahiusahan sa misyon ipakita karon nato dinhi sa bulan sa Setyembre — ang Bulan sa Bokasyon. Ang atong simbahang lokal sa iyang tanang hut-ong gidasig nga magsaulog niining bulan sa bokasyon sa makahuluganon, masaksihon, ug mabungahon nga paagi.

Kaakuhan sa tanan
Angay nga bation sa tanang magtutuo, nga ang pag awhag sa bokasyon pinaagi sa pag-ampo, pagtawag, pagdasig ug pagsuporta, kaakuhan sa tanan. Kaakuhan kini sa tibuok Simbahan, sa matag binunyagan, sa mga layko ug giordenahan nga magtutuo. Labi na gayud, dakong kaakuhan kini sa mga ginikanan ug mga magtutudlo ug saksi sa pagtoo, kay sila ang unang magpamatngon sa mga kabataan bahin sa bokasyon gikan sa Diyos alang sa pagpangalagad sa Simbahan.

Pag-ampo
Ang una natong tahas labot sa bokasyon mao ang pag-ampo sa tag-iya sa ani nga magpadala pa ug dugang pang mamumuo sa iyang parasan. Ang Ginoo mismo ang nagpahimangno niini. Diha sa Mt 9:35-37, taliwala sa kahimtang sa kakulang sa mga magbalantay sa katawhan, gisugo ni Jesus ang iyang mga sumusunod nga mag-ampo.

Dako kaayo ug daghan kaayong katawhan ang atimanonon sa Simbahan, apan diyotay ra ang atong mga Pari ug mga Relihiyoso, ug mga laykong ministro.

Kita dinhi sa diyosesis nagaagi na usab ug krisis sulod sa 5 ka tuig, 2014-2018 kanus-a walay pagaordinahan nga pari alang sa atong diyosesis. Apan, daghan ang magmaestro, magpulis, magnurse, magenhinyero, magkomersiyo, ug uban pa nganong naingon man niini ang atong kahimtang.

Nagkulang kaha kita sa pagpakabana ug pagtagad niining kinahanglanon kaayong bahin sa atong Simbahan? Kon naay krisis sa bokasyon sa Simbahan karon, ang ugat sukaranan niini mao ang pagkulang na sa pag-ampo. Ang pagtoo nga sukaranan sa pag-ampo sa tawo, huyang na. Mas sayon alang sa modernong tawo ang maminaw sa kalibutan kay sa maminaw sa tingog sa Dios. Mas dali kita ma-agni sa kalingawan sa kalibutan kay sa hingpit nga kinabuhi nga gitanyag sa Dios. Daghan unta ang gitawag, apan gamay ra ang buot maminaw ug nagmaisugon nga modawat.

Busa, magpadayon ug maglig-on pa gayud kita nga magkahiusa nga mag-ampo alang sa bokasyon. Kini maoy una natong tahas alang niini. Ang bokasyon gikan sa Dios. Kinahanglan natong ipahayag sa “tag-iya sa parasan” nga buot natong madugangan ang mga mamumuo sa parasan. Nagkinahanglan kita makat-on magmatngon ug maminaw sa iyang tingog ug modawat niini.

Ania ang pipila ka mahimo natong ipahigayon sa parokya…

  1. Sa matag kasaulogan sa Misa ug Kasaulogan sa Pulong diha sa kapilya, ilakip ang pag-ampo sa bokasyon.
  2. Ipahinungod ang senemana nga adorasyon sa Sakramento sa Yukaristiya, alang sa Bokasyon.
  3. Mag awhag sa mga kabataan ug batan-on nga magbunot ug moangkon og usa ka ngalan sa pari o relihiyoso nga nangalagad dinhi sa atong diyosesis, ug iampo sila sa kanunay.
  4. Magpahigayon og usa ka Vocation Awareness Encounter alang sa mga batan-ong lalaki ug babaye.
  5. Magpahigayon og usa ka Vocation Conference alang sa mga magtiayon sa parokya. Gikan niining mga ginikanan pilion ug tawagon sa Dios ang ilang anak.
  6. Ipaila-ila ang mga parokyano nga mitubag na sa Bokasyon sa Pari ug Relihiyoso (vocation board).
  7. Magpahigayon og Vocation FB Conversations alang sa mga netizens.

Ang diwa sa pag-ampo sa bokasyon nga angay natong batonan mao ang giingon sa Ginoo diha sa Mt 7:7-11, “pangayo kay ihatag kanimo, pangitaa ug imong makaplagan, pagtuktok ug ablihan alang kanimo.” Sa ato pa, ang hugot ug walay pagduhaduha nga pagsalig nga nahisubay sa pagbuot sa Dios ang atong gipangayo, gipangita ug buot maablihan. Matud pa, ang pag-ampo sa tawo maoy iyang gahum, ug maoy kahuyang usab sa Dios nga Amahan, maloloy-on ug mahigugmaon sa nga tanan. (jimmg48@gmail.com)

No Comments

Post A Comment