Batan-on tudluan, hatagan ug rosaryohan

Malipayong gisaulog ang ika-37 nga kasumaran sa kapistahan sa Shrine of Our Lady of the Most Holy Rosary sa Buhangin, niadtong Oktubre 31. Ang Santos nga Misa gipangulohan ni Arsobispo Romulo G. Valles, uban nila Msgr. Jimmy Gamboa, Rev. Fr. Elvie Bordios, Msgr. Max Sarno, ug ang Kura Paroko sa St. Mary of the Perpetual Rosary Parish nga si Rev. Fr. Jess Samaniego. Ang Arsobispo malipayong mitimbaya sa daghang kabatan-onan nga mga bag-ong recruit sa Confraternity of the Perpetual Rosary Movement (CPRM). Gihagit ang matag miyembro sa CPRM sa pagpadayon ug pagrecruit og mga batan-on kay sila man ang manununod sa gimbuhaton sa pag-ampo sa Santos nga Rosaryo.

Matud pa niya, dili lamang pagrecruit ang himuon apan pagtudlo usab sa pagpangadye sa Rosaryo. Nanghinaut sab siya nga mahatagan unta sila sa tagsa-tagsa ka rosaryohan. Dugang niya, sumala sa Synod of Bishops sa Roma nga iyang gitambungan dili pa lamang dugay, diha sa pamilya magsugod ang buhat sa pagkamainampoon kay sumala pa ang pamilya nga hiusang nag-ampo, nagapabiling hiniusa kanunay.

Inigkahuman sa Santos nga Misa gipahigayon ang programa sama sa Coronation sa Gng. CPRM 2015 diin si Gng. Lucita Young sa St. Mary of the Perpetual Rosary Parish ang nahimong Ginang CPRM karong tuiga. Aduna puy presentasyon ang mga batan-on gikan sa St. James Parish sa Bunawan. Sumala pa ni Gng. Betty Tormis kining programa ilang gihalad sa Mahal nga Birhen. (Naldz Villodres | Hermie Mapute | SMP SoCCom)