Hari sa pag-alagad

Solemnidad ni Kristo nga Hari
Dn. 7:13-14/Sal. 93:1-2, 5/Pagpadayag 1:5-8/Jn. 18:33-37

Kung magdula ta sa baraha o cards, ang king o hari maoy kasagaran pinaka taas sa ranggo kung magsugod kita sa uno o alasK. Apan ang hari o king pildi sa alas. Bisan ang alas pildi sa stopper nga mao ang dos. Mao tingali nga alang sa uban nga nakakita kang Kristo nga nagdupa sa krus, nga adunay litra INRI nga nagkahulugan si Kristo Hari sa mga Hudiyo, siya dili hari kay pildi siya atubangan sa nagbiay-biay kaniya.

Sa pagkatinuod, ang pagkahari ni Kristo dili pagpalabaw sa gahum o kusog o garbo. Ang iyang pagkahari wala sa pagpaluhod sa kadaghanan tungod sa kahadlok. Ang iyang pagkahari dili mao ang pagpugos sa pagpatuman sa tanan kung unsay iyang isulti. Ang iyang pagkahari dili gikan sa iyang pamati sa kahawod.

Ang pagkahari ni Kristo mao ang pagpaubos ug pagpangalagad. Siya hari tungod sa iyang paghalad sa iyang kaugalingon alang sa tanan. Siya miserbisyo aron ang tanan maluwas. Siya hari sa paghigugma. Sa iyang pagkahari ang tanan makabig tungod sa iyang matinuda-anong pagsaksi, sama sa nadungog nato sa ikaduhang pagbasa. Ang tanan mohimo sa iyang gipahimo tungod sa pagkaamgo sa kaayo sa Ginoo. Tungod niini, ang iyang pagkahari gitagna na kaniadto sama sa gisaysay sa unang pagbasa nga gingharian nga walay katapusan. Ang iyang pagkahari sa pag-alagad modulot gayod sa kahiladman sa kasing-kasing.

Sa atong pag-ambit sa iyang pagkahari tungod sa atong bunyag, nangwenta ba kita human kita makatampo sa atong bahin o nakahatag og hinabang sa katilingban? Namuyboy ba kita human kita misuporta ug naka-ayuda sa nanginahanglan? Naningil ba kita og balus aron hibayran ang atong kaayo nga gipakita sa isigkatawo?

Hinaut nga sama ni Kristo, ang atong pag-alagad walay pagkwenta, ang atong ayuda walay pagpamuyboy, ang atong kaayo walay balus nga bayad. Kini ang panig-ingnan ni Kristo, hari nga maalagaron, hari sa paghalad sa kaugalingon, hari sa tanang katawhan.

No Comments

Post A Comment