Desyembre 25 ba ang adlaw’ng natawhan ni Jesukristo?

Ang Pulong Christmas orihinal nga gikan sa duha ka kahulogan nga “Christ’s Mass”, ug gikuha usab sa karaan nga English Cristes mæsse, nga unang nasulat niadtong tuig 1038, “Cristes” gikan sa griyego nga Christos ug ang “mæsse” gikan sa latin nga missa o holy mass.

Ang kasaysayan sa Pasko o Christmas nagsugod gayud diha sa Balaang Kasulatan o Bibliya nga makita diha sa Ebanghelyo ni San Mateo 1:18, 2:12 ug maingon man usab sa Ebanghelyo ni San Lucas 1:26, 2:40.

Kini nga mga pasahe sa Bibliya naga-asoy sa pagka-tawo ni Ginoong Jesukristo diha kang Birheng Maria inubanan sa pagbantay ni San Jose diha sa lungsod ni David nga mao ang Israel siyudad sa Bethlehem. Ang kasaulogan sa pagkatawo ni Ginoong Jesukristo o Christmas day nagsugod niadto pang unang siglo.

Ang DESYEMBRE 25, petsa sa maong kasaulogan sa pagkatawo ni Ginoong Jesukristo opisyal nga gisaulog sa Roma niadtong tuig 325 ug 350 A.D. Kini nga petsa mao ang giila sa tibook kalibutan diin natawo ang atong Ginoo, kini usab nga petsa aron mahatagan gayud ug pagsabot subay sa pagbuntis ni Santa Elizabeth kang Juan Bautista.

Nahitabo kini sa dihang giduaw ni Anghel Gabriel si Zachariah, ang bana ni Elizabeth ug mao ang Pangulong Pari kaniadto gipahibalo ni Anghel Gabriel kaniya nga magmabdos ang iyang asawa nga si Elizabeth bisan ug tigulang na kini, gimbut-an kini sa Dios aron nga magpadayon ang iyang misyon (cf. Lucas 1:5-23).

Si Zacharias misulod sa Templo agi ug pagtuman sa maong tulumanon. Kini mahitabo ka duha sa usa ka tuig (Cf. 1 Cronicas 24-27), matag bulan sa Hunyo ug Desyembre.

Kadtong panahon ang misulod si Zacharias sa Templo nga didto nagpakita si Anghel Gabriel ug nagpahibalo kaniya nga magmabdos ang iyang asawa nga si Elizabeth, ug maong natawo si San Juan Bautista sa Bulan sa Hunyo.

Kini mao ang atong basihan, ug basi sa gitala ni San Lucas nga unom ka bulan ang magulang ni San Juan kay Ginoong Jesukristo (Lucas 1:36), si San Juan Magbubunyag natawo sa Hunyo 24 ug kung ato kining kwentahon sa normal nga paagi sa pagkatawo kita sabakon sulod sa siyam ka bulan sanglit unom man ka bulan ang magulang ni San Juan kang Kristo busa si Kristo na tawo sa Bulan sa Desyembre ug sumala pa sa ubang natala ang bulan diin atong ginasaulog ang Annunciation o ang pagpahibalo sa Anghel nga magsabak si Birheng Maria bulan kadto sa Marso 25 ug mao kini ang opisyal nga petsa diin gisabak ni Birheng Maria si Ginoong Jesukristo (Lucas 1:26-38).

Sama sa normal nga paagi sa pagpanganak kita sabakon sulod sa siyam ka bulan ug kon ato kining kwentahon si Kristo natawo sa Desyembre 25. Ug bisan pa ang mga dagkong libro sa kasaysayan nagpamatuod gayud nga ang Desyembre 25 mao ang bulan ug adlaw diin natawo ang atong Ginoo. Sa pasangil nga kini daw nga klase sa selebrasyon gikan sa Pagano usa lamang kana ka tinumotumo, kon adunay may sa Pagano nga Desyembre 25 dili kadto iya sa Kristiyano kay sa unang punto pa lamang kitang mga Kristohanong Katoliko nagsaulog ug Pasko sa pagkatawo sa atong Ginoo ug ang sentro niana mao ang pagsimba, pagdayeg ug pagpasalamat sa tinuod nga Dios ug sa pagpasidungog kaniya ug tataw kaayo nga si Kristo gayud ang atong gisaulogan dili ang dios sa mga pagano.

Tinuod nga kaniadto adunay dakong selebrasyon usab ang mga pagano didto sa Roma naila nga Sol Invictus (“Unconquered Sun”) o ang pagsimba sa mga pagano sa adlaw nga ila usab kining ginahandom matag-Desyembre 25.

Apan kini walay kalambigitan sa kasaulogan natong mga Kristiyano kini pagpadayag lamang nga kung ang tawo o ang mga pagano kaniadto adunay sinayop nga kasaulogan, gipatama lamang kini sa atong Ginoo.

Kitang tanan nasayod nga sa matag-bulan sa Desyembre ang tibook katawhan sa kalibutan nagasaulog paghandom sa ADLAW’NG NATAWHAN NI GINOONG JESUKRISTO.

Diri klaro ug dayag kung kinsa ang atong gipahinongdan bisan ug bata pa ang atong pangutan-on kon unsay Pasko.

Bisan sa ilang bata pa nga pangisip sila motubag sa wala gayoy duha-duha nga ang Desyembre 25 Birthday ni Papa Jesus, busa walay rason nga moingon kita usa kini ka klase sa pagano nga selebrasyon.

Hinoon kini usa ka sagradong selebrasyon sa pagpakita sa atong hiyas nga pagka-Kristohanon, apan subo nga huna-hunaon nga daghang sekta Protestante karon nga masuko nganong atong saulogon paghandom ang adlaw nga natawhan sa atong Ginoo nga unta pinaagi sa iyang pagkatawo naghatag ug tulay kanato nga makadawat kita ug GRASYA UG KALUWASAN.

Busa unsa man nga klaseng pagtoo ang anaa kanila, iya ba ni Kristo? o basi ug nagdala lang sa ngalan ni Ginoong Jesukristo? Mga Kaigsonan namo kami uban sa among grupo ug tibook pamilya kami sa kanunay nagapanghinaut nga saulogon nato kining pagkatawo sa atong Ginoo sa pagtamod sa atong gugma sa matag-usa ug sa kanunay mag-ampo kita sa kalinaw alang sa tanan.