Bag-ong istruktura sa pag-alagad ilunsad sa GKK

Usa ka bag-ong istruktura alang sa pag-alagad sa Gagmay’ng Kristohanong Katilingban ubos sa ministriya sa pag-alagad kon Social Action. Kini maoy gi-anunsiyo ni Fr. Leonardo Dublan, Jr., Direktor sa Archdiocesan Social Action Center atol sa PSAM General Assembly niadtong milabay’ng Sabado, Enero 9, 2016.

Gipasabot ni Fr. Dublan sa kapin 2000 ka mga Pangulo sa Alagad (PSA) sa mga GKK nga ang GKK Social Action Committee (GSAC) maoy pamaagi sa pagpakusog sa service ministry o social action ministry pinaagi sa paglantaw sa nagkalain-laing lihok sa pagpangalagad sama sa social, political, economic, environmental, cultural ug spiritual nga bahin sa kinabuhi.

Bunga ang GSAC sa mga milabay’ng konsultasyon sa mga GKK leaders ug mga kaparian niadtong mga milabay’ng tuig aron mahimo ang bag-ong GKK Norms and Guidelines nga maoy mahimong giya sa pagpadagan sa mga kalihukan ug programa sa GKK.

Dugang ni Fr. Dublan nga kabahin sa responsibilidad sa GSAC ang paghimo og mga kalihukan sama sa Income Generating Projects, Disaster Preparation, Baratong tambal gikan sa Botika sa Parokya, Tree planting and recycyling ug Pagpangampanya mahitungod sa political education.

Sa kasamtangan, ang ministriya sa pagpangalagad gilangkoban sa daghang mga Pangulo sa Alagad kon PSA sa matag GKK.

Sa bag-ong struktura, usa ka PSA sa matag GKK maoy magdumala sa ministriya sa pagpangalagad nga gibahin sa musunod: Socio economic, GKK Emergency Response Team (GERT), Advocacy, ug Health ug ang maong mga areas of concern pangulohan sa ubang mga pangulo nga kanhing nagdumala isip PSA.

Dugang ni Fr. Dublan nga ang GSAC usa ka pamaagi sa shared leadership kon panagtinambayayongay.

“Ang PSA isip pangulo sa GSAC kinahanglan nagareport sa mga kalihukan niini ngadto sa GKK Servant Leaders meeting,” giingon ni Fr. Dublan.

Sa karon, ang GSAC mamahimong epektibo pinaagi sa panagtinambayayongay sa mga laykong pangulo ug mga kura paroko sa Arkidyosesis sa Dabaw.