Tara na, motabok sa Pultahan sa Kalooy

Ang pagabli sa balaang pultahan sa kalooy ug ang solemneng prosisyon sa lokal nga Simbahan maoy gitakda nga panahon sa pagsugod sa labaw sa ordinaryong hubileyo sa Tuig sa Kalooy. Niining takna ang Obispo, ang mga kaparian, mga relihiyoso ug mga laykong magtotoo nagprosisyon padulong sa Katedral nga maoy pinaka sentro nga simbahan sa Simbahang lokal, diin ang Obispo nagatudlo, nangulo sa kasaulogan sa mga balaang misteryo, ug nagdumala sa iyang katawhan.

Alang kanato diri sa Diyosesis sa Digos nahitabo kini niadtong Diciembre 14. Ang Balaang Pultahan didto sa Katedral nahimong Pultahan sa Kalooy diin ang bisan kinsa nga moagi niinii makasinati sa gugma sa Dios kinsa nagahupay, nagapasaylo ug nagahatag og paglaum.

Pagabot sa prosisyon didto sa may Pultahan sa Kalooy, ang Obispo miingon, “Ablihi ang mga ganghaan sa hustisya; mosulod kita aron magpasalamat sa Ginoo.” Ug samtang ginaabli ang pultahan, siya nagpadayon sa pagingon, “Kini mao ang ganghaan sa Ginoo: mosulod kita aron makadawat og kalooy ug kapasayloan”.

Ang tanan nga nanambong gikan sa nagkalainlain mga parokya ug eskwelahan ug mga katilingban, nangahas ug maisugong misulod sa Katedral pinaagi gayud sa maong pultahan sa kalooy. Ug sa katilingahan nga paagi, nasinati ang kahibilungan nga paghikap ug pagtandog sa Spirito ni Kristo, kinsa mao lamang ang pultahan aron makasulod kita sa kaluwasan (Jn. 10:9), ug ang ulusahong dalan padulong sa Amahan (Jn. 14:6).

Tungod niini daghan ang natandog sa paghikap sa pultahan sa kalooy, sa paghalok niini, sa pagyukbo. Ang pipila nakahilak, nagtimaan sa ilang pagmatngon nga aniaa ang balaang pagkaanaa ni Kristo. Gikinahanglan lamang ang sakto nga disposisyon sa matag tawo nga mapaubsanon nangaliyupo sa kalooy ug pasaylo sa Dios. Ug sa pagsaad nga dili na magpakasala pagusab.

Ang Pagtabok sa Pultahan sa Kalooy, kinahanglan inubanan sa panawduaw, pagsaulog Pakiguli ug sa Misa ug pagkalawat, pagpamalandong sa Diosnong Kalooy, pagpahayag sa Pagtoo (Kredo), ug pagampo alang sa mga intensyon o pahanungdan sa Santo Papa alang sa Simbahan ug tibuok kalibutan. Kini ang giingon ni Papa Francisco (Letter of Pope Francis on the Plenary Indulgence, 1 September 2015).

Si Papa Francisco nag-ingon usab nga bisan sila nga dili makaadto sa Balaang Pultahan sa Kalooy, sama sa mga masakiton, mga tigulang, mga naginusara sa balay, ug ang mga binilanggo, mahimo nga motabok sa Pultahan sa Kalooy pinaagi sa ilang pag-apil sa Misa, pagkalawat ug katilingbanong pag-ampo, ginamit usahay ang modernong kahimanan sa komunikasyon, nga diha sa ilang pagantos ug kasakit mahiduol sila pag-ayo kang Kristo kinsa nagahatag og kahulugan sa tanang kasakit. Sa ingon madawat lang gihapon ang Indulhensiya Plenarya.

Ang Maloloy-ong Amahan buot mahiduol sa mga sad-ang binilanggo nga buot niyang tandogon pinaagi sa iyang pasaylo. Pinaagi sa mga kapilya sa Prisohan madawat usab nila ang Indulhensiya Plenarya. Mipadayon pagingon ang Santo Papa nga ang mga binilanggo mahimo nga maghunahuna ug magampo ngadto sa Amahan sa matag igayon nga motabok sila sa pultahan sa ilang selda, nga alang kanila mahimong timaan sa Balaang Pultahan, kay walay dili mahimo sa Ginoo.

Gitumong sa panawduaw padulong sa Pultahan sa Kalooy ang tinguha sa pagbag-o sa kinabuhi tungod kang Kristo. Sa atong pagtabok sa Pultahan sa Kalooy matagmtaman unta nato ang maloloy-ong gakos sa Dios, ug magaghat kanato sa pagmaloloy-on sa uban sama sa Iyang pagkalooy kanato.

No Comments

Post A Comment