Korapsyon – Nag-una sa mga suliran sa Katilingban; Pol-Ed gihingusgan

Korapsyon ang nag-unang giilang suliran sa katilingban karon. Kini maoy migula nga kumon nga hinungdan sa kalisod karon base sa gipahigayon nga Trainers’ Training Seminar alang sa Political Education nga gipangunahan sa Archdiocesan Social Action Center kon ASAC.

Malampusong gipahigayon na sa 3 ka mga bikaryato ang Trainers’ Training niadtong Pebrero 20,27 ug 28 nga gitambongan sa PSAM Coordinator ug duha ka mga partisipante gikan sa Formation Ministry. Ang maong mga Trainers maoy mag-re-echo ngadto sa ilang tagsa-tagsa ka mga parokya aron nga mapaabot usab kini ngadto sa ilang tagsa-tagsa ka mga GKK.

Giklaro sa maong seminar ang papel sa Simbahan ug sa matag usa ka binunyagan ang misyon nga naglambigit sa pulitikanhong kalihukan.

Si Fr. Leonardo Dublan, director sa ASAC mipasabot nga, “Giila nga kini ila sa politika ang paghatag han-ay ug kalambuan sa katawhan apan ang simbahan molambigit gayud diha sa pagpalambo sa hisgutanang hustisya. Kini mao ang gipakadak-an nga papel sa simbahan nga ato gayud isulong ang pagpaningkamot nga ang atong political life mokab-ot sa pagpadayag sa hustiya, kalinaw ug kalambuan sa katawhan. Ang pag-umol sa KONSENSYA sa tawo mao ang ikatabang sa Simbahan, una sa tanan diha sa pagpalambo sa politikanhong kinabuhi.”

Tagsa-tagsa nang gipahigayon karon ang paglusad ug paghatag ug seminar alang sa political education sa mga botante sa tibuok Arkidayosis sa Dabaw ug sa mga iskuylahan nga ubos sa pagdumala sa Davao Association of Catholic Schools (DACS).

Isip pag-implementar sa proyekto nga E=CHAMP kon Eleksyon alang sa Clean (Limpiyo), Honest (Matinud-anon), Accurate (Ensakto), Meaningful (mahinungdanon) ug Peaceful (Malinawon) kansang nag-unang ahensiya mao ang DACS ug gi-suportaran usab sa Archdiocesan Social Action Center kon ASAC.

Sa samang higayon, gipa-ilawom na usab sa us aka Trainers’ Training and tanang E-champ coordinators gikan sa nagkalain-laing katolikong mga iskuylahan niadtong Marso 4, 2016 sa DACS conference room alang sa hapsay nga pagpahigayon sa political education ug ingon man alang sa padayong pagpalista sa mga buot nga mobulontaryo nga motabang alang sa poll watching ug voters’ assistance.

Namahayag si Mr. Jimmie Loe Dela Vega, Executive Director sa DACS, “assigned schools must coordinate also with their respective parishes,” ug midugang, “I am hoping that during Sunday’s masses, priest may also help to invite and encourage people to participate for this activity.”

Gikinahanglan gayud ang ensaktong pagpakighilambigit tali sa mga tulunghaan ug sa mga parokya aron nga malukop ang tanang mga polling precincts nga mabutangan ug mga poll watchers panahon sa eleksiyon. Gipahimangnuan ni Mr. Dela Vega ang mga E=CHAMP coordinators sa tulunghaan nga “for some communities that cannot be covered by the assigned coordinators, parishes near to those places can also help to inform and allow residents from that area to be part of E-Champ’s mission.”

Kadtong mga dili makapalista sa ilang mga parokya mamahimo usab nga iduso sa mga coordinator sa parokya ngadto sa DACS. Ang katapusang adlaw sa pagpalista alang sa mga E=CHAMP alang sa opisyal nga ipa-ilawom sa mga training ug seminar karon nang unang semana sa Abril 2016. Samtang sa Abril 6, 2016 magtagbo pag-usab ang mga E-champ coordinators aron sa paghimo ug mga plano alang sa pagpangandam sa mga volunteers ug paglusad ug forum tali sa mga local nga mga kandidato. (kauban sa report ni REYNALDO BARIQUIT, UIC Intern)