Mga Eukaristikanhon nga mga Lihok Dinha sa Pamaagi sa Piniliay

Human sa ika-51 Internasyonal nga Kongreso sa Eukaristiya didto sa Cebu niadtong Enero 24-31, 2016 nagpakanaog og mensahe ang atong mga kaobispohang Pilipino (CBCP) bahin sa Eukaristiya ug Kinabuhi. Ang katapusang bahin niini naghisgot bahin sa umaabot nga Piniliay. Ania ang mga importanteng punto nga ilang gihatagn og katinawan:

1. Ang Eukaristiya dili haom sa atong paagi sa piniliay?
Pinakatin-aw nga ang atong pagtuo sa Eukaristiya dili haom sa paggamit og kabangis, pamalit og mga boto ug panikas sa panahon sa piniliay. Kini nga kahakog, makadaot ug sala. Niadtong mga nanaghimo sa ingon nga bansay unahon unta ang pagbasol ug mukumpisal sa ilang sala sa dili pa muduol sa Balaan nga Pagkalawat aron pagdawat sa Ginoo. Among ipahinumdom sa makadaog sa ingon nga paagi nga matikason nga sa kamatuod wala silay katungod nga moral pagbaton sa katungdanan nga ilang gikawat.

2. Ang Pagpili lamang sa Maayo.
Nga kitang tanan matultolan unta sa usa ka pamalatian sa kaayohan sa tanan sa atong pagpili sa mga pangulo nga alang kanila namatay si Kristo.

Pilion nato kadtong tinuod nga ligdong, naghalad sa kaugalingon, nagtahod sa kahalangdon sa tanan ug mabination sa mga kabos

3. Pagsalikway gayud sa Dautan
Amo usab nga giawhag ang mga matuuhon sa dili pagtugot nga mahimo sila nga mga himan sa panikas. Pagbaligya og boto usa ka pagduyog sa sala. Batok usab kini sa kaayohan sa tanan.

Isalikway nato kadtong dili matinuuron, mga tikasan, mga nangita lamang sa kaugalingong interes ug hingalimtanon sa mga kabos.

Ang dili pagbotar sa partikular nga puwesto kon walay usa nga sibo niini usa usab nga tinugotan nga Kristuhanon nga politikanhon nga pagpili. Pagbotar og minos nga daotan pagbotar gihapon og daotan.

4. Dakong katalagman kon daoton ang palakaw sa piniliay
Sa ngalan sa Dios, among gisangpit ang tanan nga may gahom dugtong sa palakaw sa piniliay sa dili pagmanipular ug pagsubmarino sa bisan unsa nga paagi sa palakaw sa piniliay pagpalabi sa maskin kinsang tawo o partido nga politikanhon. Paghimo sa ingon dili lamang dako nga supak sa kabubut-on sa Dios, makasangpot kini og dagko nga katalagman sa nasod.

5. Palabihon ang Dios, dili ang tawo
Sa ngalan sa Dios, amo usab nga giawhag ang tanan nga may labot sa piniliay o sa mga kaso nga dugtong sa mga piniliay pagsukol sa bisan unsang pagduot kanila paglihok o batok ni bisan kinsa o maskin unsa nga partido nga politikanhon. Kon ingnon sila niini, maisugon unta silang muingon: “Kinahanglan sundon namo ang Dios, ug dili ang mga tawo” (Acts 5:29).

No Comments

Post A Comment