Pamilya, tinubdan sa bokasyon sa pagkapari

TAGUM CITY—Pamilya ang gitudlo nga tinubdan sa bokasyon sa pagkapari dinhi sa Diyosesis sa Tagum nga bag-o lang gigasahan sa walo ka bokasyon sa pagka-diakono.

Atol sa pagsaulog sa ika-75 anyos nga adlaw’ng natawhan ni Tagum Bishop Wilfiredo Manlapaz, walo ka mga diakono ang iyang gi-ordinahan. Sa Simbahang Katoliko, gimandoan ang tanang Obispo nga mag-edaron og 75 nga maghimo og kasulatan na sila mu-retiro ngadto sa Santo Papa apan samtang wala pa gidawat ang iyang pagretiro, gi-ordinahan usa niya ang iyang mga seminarista.

Dinhi gipadayag gayud ang kamahinungdanon sa unang mga magtutudlo sa mga diakono, ang mihubog sa ilang pagkatawo, ang ilang pamilya.

Haom usab kini sa kasaulogan sa World Day of Prayer for Vocations sa ika-upat nga Domingo sa Pagkabanhaw, Abril 17, nga gihinganlan usab ni Papa Paulo VI niadtong tuig 1963 isip Good Shepherd Sunday.

Si Hesus, ang Maayong Pastol, naga-uban sa iyang mga ginsakpan kinsa maoy gitawag aron ipadala ngadto sa halapad nga parasan sa Ginoo sanglit ang sanggi-onon daghan apan gamay lamang ang mga mananggi.(Luke 10:2).

Karon mao ang ika-53 nga anibersaryo kansang tema, “Kita ang katawhan sa Ginoo,” nagpahinumdum kanato sa pagtuman sa tawag sa bokasyon nga ang tanang mga Kristyanos nakadawat niini sa iyang bunyag.

Si Papa Francisco nagpunting usab niini sa iyang labing ulahing mensahe sa Amoris Laetitia, nga ang panaw ngadto sa bokasyon mahitabo kauban ang mga igsoon kinsa maoy gihatag sa Ginoo kanato.

Mamahimong lantawon kini nga nagtumong sa pamilya kinsa maoy gihatag kanato, ang Kristohanong pamilya kinsa nakadawat sa mando sa simbahan sa pagpalambo sa bokasyon sa iyang mga anak.

Mao usab kini ang gipadayag nga panghitabo sa mga bokasyon sa walo ka mga diakono kinsa midawat sa sakramento sa ordinasyon pinaagi sa pagtapi-on sa kamot ni Bishop Wilfredo Manlapaz sa ulo sa mga gi-ordinahan, kinsa mao ang musunod:

Rev. Lou Jake Colarines
Rev. Niño Estebaya
Rev. Ianeil Melendres
Rev. Rey Ringo
Rev. Rey Niño Rosal
Rev. Adoni Buladaco
Rev. Robert Legaspi
Rev. John Kristoffer Nalam

Sa pakighinabi sa DCHerald sa usa sa mga gi-ordinahan nga si Rev. Melendres, giingon niya nga kasagaran sa mga gina-ordinahan sa Tagum adunay mga ginikanan nga aktibo nga nagserbisyo sa Simbahan.

Si Bp. Manlapaz mapasalamaton sa mga ginikanan sa gi-ordinahan sa ilang pagkama-manggihatagon tungod ilang gihalad ang ilang anak aron muserbisyo sa lokal nga simbahan sa Tagum.

Gipahimangnoan usab niya ang mga bag-ong gi-ordinahan nga magpabiling putli ug dili minyo tungod mao kini ang ilang saad sa pagdawat sa maong grasya sa bokasyon.

Gipasalamatan niya ang mga kaparian ug layko nga kauban niya sa pagserbisyo sulod sa iyang 35 ka tuig isip obispo ug 52 ka tuig isip pari.

Gihinumdom usab niya ang iyang gisundan nga obispo nga si Bp. Joseph Reagan nga maoy iyang inspirasyon sa pagsilbi sa lokal nga simbahan sa Tagum.