Panagtigum sa mga Pangulo sa Panudlo sa Sr. Sto Nino Kaputian Parish gipahigayon pag-usab

Dako ug importante gayod ang tahas o papel sa mga maestra sa kinabuhi sa bisan kinsa dinhi sa kalibutan. Ang maestra mao ang tighulma ug propesyon pinaagi sa pagtudlo aron madugangan ang kaalam ug aron makab-ot sa tawo ang iyang buot abuton sa kalibutanhong kinabuhi. Pareha usab kang Kristo, siya walay puas nga migahin sa iyang tanang panahon, kusog og kaalam sa pagtudlo mahitungod sa pulong sa Dios Amahan samtang siya ania pa sa kalibutan.

Kaniadtong Abril 9, 2016, gipahigayon sa Sto Nino Kaputian Parish ang panagtigum sa mga Pangulo sa Panudlo nga nahisakop sa parokya. Kini gipahigayon alang sa usa ka adlaw nga paglingaw o bonding sa matag pangulo sa panudlo ug aron sa pag-ilhanay pa gayod nila sa matag usa. Gisugdan ang panagtigum sa usa ka balaang misa nga gisalmutan sa 65 ka mga pangulo ug uban pa nga mga parokyano. Gisundan kini sa usa ka pagpinulungay mahitungod sa mga katikaran nga mahitabo nga naay kabahin sa ilang papel isip manunudlo. Pagkahapon, adunay gipahigayon nga mga nagkadaiyang parlor games nga naay premyo kung kinsa man ang makadaog. Aduna usab giveaways nga gipanghatag gikan kay Fr. Rico Enriquez nga payong sa matag usa. Ang malipayong panagtigum ginabuhat matag tuig isip pasalamat na sab sa mga manunudlo nga andam gayod mugahin ug saktong panahon sa pagsangyaw sa pulong sa Dios.

“Isip mga sumusunod ug tumutuo sa atong Ginoo, padayon kita sa paghatag sa atong kaugalingon pinaagi sa paggahin sa atong panahon sa pagsangyaw. Isip pangulo sa panudlo sa GKK, kini pribilihiyo gayod tungod kay kita naga-ambit sa misyon sa atong Ginoo diha sa pag-alagad sa Dios ug simbahan. Mangayo kita ug kalig-on ug kaalam sa atong padayon nga pag-alagad nganha kaniya.” Ingon ni Fr. Rico Enriquez, kura paroko sa Sr. Sto. Nino Kaputian Parish.

No Comments

Post A Comment