Political Change = Pagbag-o sa Kaugalingon – Fr. Dublan

“Gusto tag kabag-ohan apan dili magsukad sa atong kaugalingon, walay pulos ang tanan,” mao kini ang hugot nga mga gibuhiang pulong ni Fr. Leonardo ‘Bong’ Dublan, Jr. atol sa iyang radio guesting sa programang, AMBIT DXGN sa DXGN 89.9 Spirit FM, Miyerkules, Abril 13, 2016.

Gihisgutan sa maong programa nga gi-host nila ni Danny Laygan ug Annie Libres ang mahinungdanon nga papel sa simbahan sa bugnong lugaynon (eleksiyon).

Namahayag si Fr. Dublan nga usa ka moral nga obligasyon sa simbahang Katoliko ang pagpangilabot sa politikanhong kinabuhi ilabi na gayud sa pagtabang sa katawhan nga makabaton ug gitawag nga political maturity.

Mao kini tumong sa gipahigayon nga political education nga gipadagan na sa tagsa-tagsa ka mga parokya ug hapit duha ka libo ka mga Gagmay’ng Kristohanong Katilingban (GKKs).

Padayon nga hisgutan sa maong programa, AMBIT DXGN alas-7 sa buntag Lunes hangtod Biyenes sa DXGN 89.9 SPIRIT FM ang mahitungod sa eleksyon sa mosunod nga mga semana.