Kapin gatosan ka mga bata sa Brgy. Bucana gibunyagan

Gipahigayon ang pagbunyag sa kapin gatosan ka mga bata kinsa nagpuyo sa Brgy. Bucana, dakbayan sa Davao. Gipangunahan ang pagpabunyag sa daghang mga bata sa mga madre sa Missionaries of Charity kinsa nga nagabuhat sa ilahang misyon labi na sa mga kabus. “In response kini sa panawagan sa Santo Papa mahitungod sa Year of Mercy na kita mu-extend sa mga igsuon na mga kabos… We found out that there are so many families whose children are not yet baptized in the community.” Ingon si Sr. Auxilia, MC kinsa usa sa mga nagdumala ug nanguna sa giingong pabunyag.

Gipahitabo sad ang pagbunyag sa mga hamtong kaniadtong Abril 29 kung asa singkwenta ka mga tao ang mingdawat sa sakramento. Pinaagi sa mga serye na mga pormasyon ug pagtulun-an, naandam pag-ayo ang mga binunyagan kinsa mas nakasabot sa pagdawat nila sa Ginoo diha sa ilahang mga kinabuhi, ilabi na ang mga ginikanan na mas nakasabot sa kahinungdanon sa pagpadako ug pag-amuma sa ilahang mga anak inubanan sa maayong pagpanudlo ug pagpaila-ila nila sa Simbahan.

Si Fr. Amado Arroyo, DCD uban ni Fr. Glenn Iba, DCD ang nanguna sa selebrasyon. Si Fr. Arroyo minghatag sad ug mensahe ug pahinumdom sa mga ginikan sa pagkamahinungdanon sa sakramento sa bunyag. Gidasig sad ni Fr. Amado ang mga ginikanan ilabi na kadtong mga wala pa nakadawat sa sakramento sa kasal na kung mamahimo ilaha sad dawaton sa dayon na panahon ang sakramento. “Unsaon nato pagtudlo sa atoang mga anak (Kristohanong pagtoo) kung kita mismo wala kasinati niining pagpadayag sa atoang pagtoo sa atoang Ginoo… You cannot give what you do not have, mao unsaon nato pagtudlo sa atong mga anak kung kita mismo wala kadawat sa sakramento sa kasal.” Ingon pa ni Fr. Amado. Ang pagdawat sad sa sakramento sa kasal makatabang ug dako sa mga ginikanan na matabangan ang mg anak na mahimamat nila ang importansya sa ilahang Kristohanong pagtoo.

Dako ug pasalamat ang mga ginikanan sa higayon susama niini kay sila natabangan na mapaduol diha sa Simbahan. Human sa bunyag, nag-andam sad ug gamay na salo-salo ang mga MC sisters alang sa mga malipayong ginikanan ug mga bag-ong binunyagan. (Jecy Opada)

No Comments

Post A Comment