Katumanan sa paglaum anaa sa matag usa

Pagsaka sa Langit sa Ginoo
Buhat 1:1-11/ Salmo 47/ Heb. 9:24-28, 10:19-23/ Lk. 24:46-53

Gisaulog nato karon ang pagsaka sa langit sa atong Ginoo. Ang iyang pagsaka sa langit dili pagbiya kanato kondili naghatag kanato sa dakung paglaum nga kita usab mosaka diin siya nahimutang karon.

Sa unang pagbasa, nangutana ang mga tinun-an kung ipahiuli ba niya pag-usab niining panahona ang gingharian sa Dios. Kini nagpasabot nga naglaum diay ang iyang mga tinun-an nga iyang ipatunhay ang paghari sa Dios. Kining maong paglaum nagsukad sa iyang pagkapari nga mihalad sa iyang lawas ug dugo alang kanato. Ang iyang sakripisyo nagdala kanato sa kalingkawasan sa atong malisod nga kahimtang nga dala sa kasal-anan. Sa Ebanghelyo gipangusgan kining maong kalingkawasan pinaagi sa Mesiyas nga mag-antus alang kanato apan mabanhaw human sa tulo ka adlaw. Ang iyang mga tinun-an maoy saksi niining maong paglaum.

Ugmang adlawa mao na ang piniliay sa mga mangulo sa atong nasud, nasyonal man o lokal. Isip mga tinun-an ni Kristo, naglaum usab kita sa pagpatunhay nga ang Dios mohari unta sa atong taliwala. Kita nangandoy nga malingkawas kita sa kalisud, makalikay sa kahimtang sa sala ug magpuyo nga malinawon ug haruhay. Wala man siguroy usa sa mga magpapili ang walay apan, pero lamgdagan unta kita sa Dios nga makapili niadtong andam mopatunhay sa kaangayan ug kaayohan sa tanan. Dili unta kita motugot nga madala sa kwarta o hulga. I-ampo nato nga unta mapili kadtong mga andam mosakripisyo sa ilang kaugalingon alang sa kalingkawasan sa kadaghanan.

Gihatagan kita sa ehemplo ni Kristo sa paghikalimot sa kaugalingon aron motunhay ang kabulahanan sa tanan. Ato untang sugdan ang disiplina sa kaugalingon kay bisan unsa pa kaayo sa mga mapili nga mangulo kanato kung kita maghangad lamang nga magpaabot sa kausaban nga walay aksiyon ug disiplina sa kaugalingon, wala gihapoy mahitabo. Sa ginagmay nga pamaagi, sama sa pag-obserbar sa mga balaod sa trapiko, sa pagmentinar sa kalimpyo sa palibot ug sa dili pagpamintaha sa uban, ang gingharian motunhay. Walay paglaum nga matuman kung ang matag-usa dili manlimbasog.

No Comments

Post A Comment