Pagpasaylo ug Pagpangayo’g Pasaylo: Pagpapadayag sa Kalooy sa Ginoo

2 Sam 12:7-10,13 / Ps 32:1-2,5,7,11 / Gal. 2:16,19-21 / Lk 7:36-8:3

Dili sayon ang pagpasaylo, sama nga dili sayon ang pagpangayo’g pasaylo.

Kung pananglitan adunay makahimo ug sayup batok kanato, sagad natong reaksyon, mao ang pagbalos. Ug kung ugaling kita maoy makahimo’g salaud, sagad natong mamahimong reaksyon mao ang paglimud. Mangita kita’g paagi sa pagtago sa atong sayup tungod kay hadlok kita maulawan.

Ang tema sa atong mga pagbasa niining ika-11 nga Dominggo sa Ordinayong Panahon, mao kining pagpadayag sa kalooy sa Diyos pinaagi sa pagpasaylo sa tanan nga mga makasasala nga sama kanato.

Ang sugilanon ni Hari David nga gihisgutan sa atong unang pagbasa, ingun man ang istorya sa makasasalang babaye nga gihisgutan sa atong Ebanghelyo, sugilanon usab natong tanan. Kini tungod kay, sa pagkatinuod, kitang tanan makasasala man.

Apan ang nakanindot sa kasinatian ni Hari David ug sa kasinatian sa makasasalang babaye diha sa atong Ebanghelyo tungod kay sila miangkon ug midawat sa ilang kalapasan, ilang nasinati ang walay kinutuban ug walay gipinig nga gugma ug kalooy sa Dios.

Sa atong kasinatian karon human milabay ang piniliay, daw sa nagpabilin ug wala pa maalim ang mga samad sa nanagbingkil ug nanagbangi nga mga kabubut-on. Daw sa lisud makab-ot ang pagpinasayloay. Tungod kaha kay walay unang mopaubos ug moangkon nga siya sad-an? O nakalimot ba kaha kita sa kamatuoran nga kitang tanan sad-an?

Hinaot nga sama ni Hari David ug sa nahisgutang babaye sa atong Ebanghelyo, maantigo unta kitang modawat sa atong tagsa-tagsa ka kasaypanan, ug kinasing-kasing nato kining hinuklugan ug hinulsulan, aron sa ingun maantigo usab kitang mangayo ug pasaylo ug mopasaylo. Niining paagiha, masinati nato ang kalooy sa Ginoo!

Sa atong pagpadayun sa pagpamalandong, nindot nga atong susihon ang atong kaugalingon: unsa bay akong kinaiya ngadto sa mga tawo nga akong nasad-an? Unsa bay akong kinaiya ngadto sa mga tawo nga nakasala kanako? Maantigo ba ako nga mangayo ug pasaylo? Maantigo ba ako nga mopasaylo? (Christopher Alcayde)

No Comments

Post A Comment