Diin ang Bahandi, Atua ang Kasingkasing

August 7, 2016, 19th Sunday in Ordinary Time
Wis 18:6-9/ Heb 11:1-2, 8-19 (or 11:1-2, 8-12)/ Lk 12:32-48 (or 12:35-40)

Niadtong milabay’ng Dominggo gihagit kita nga maoy atong pangitaon ang mga bahanding langitnon inay ang mga butang kalibutanon. Ug niining ika napulo’g siyam nga Dominggo, ang pahinumdom mao nga kung diin atua ang imong bahandi, atua usab ang imong kasing-kasing. Ang pangutana karon, unsa ba alang kanimo ang labing mahinungdanong bahandi nga imong naangkon?

Dili nato ikalimud nga sa atong panahon karon, daghan kanato ang nangandoy nga makaangkon ug daghang bahandi — sama pananglitan sa daghang kwarta, nindot nga balay, nindot nga sakyanan, ug kaharuhay sa kinabuhi. Kini ug uban pa, mga kalibutanong bahandi nga sagad gipangandoy sa tawo. Dautan ba kini? Dili man tingali. Apan lagi usahay, kining mga butanga maoy makahimo kanatong buta sa mga butang nga mas labi pang mahinungdanon. Busa tukma lamang ang pahinumdom sa atong Ebanghelyo nga angayon nato nga sa kanunay magmabinantayon. Atong bantayan ang atong kaugalingon, ilabina ang mga butang nga anaa sulod sa atong tagsa-tagsa ka kasingkasing.

Sama pananglit diha sa atong pamilya. Usahay ang atong hilabihan nga pagpaningkamot alang sa atong pamilya mao ra usab ang hinungdan nga maguba ang atong pamilya. Usahay diha sa ka “busy” sa mga ginikanan, ang mga anak mapasagdan. Kung buot huna-hunaon kinahanglang man gayud sa ginikanan nga mokayud alang sa mga anak. Apan mao lagi, unsa bay mas labing mahinungdanon, ang imong trabaho o ang ang imong mga anak?

Sama usab diha sa atong kinabuhi isip mga Kristohanon. Isip mga mga binunyagang Katoliko, usa sa labing mahinungdanong bahandi nga atong nadawat mao ang atong pagtoo. Ang pagtoo nga gihisgutan diha sa atong ikaduhang pagbasa diin mao kini maghatag kanato’g igong kasigurohan sa mga butang nga atong gilauman. Ang samang pagtoo nga maoy nagtukmod kang Abraham aron pagtuman sa mga mando sa Diyos, bisan tuod wala kini niya hingpit nga nasabtan.

Apan subo nga pamalandungon nga sa makadaghang higayon, nahisama kita sa mga sulogoon nga wala nagmabinantayon ug wala nangandam sa pag-abot sa agalon. Sa panahon sa atong bunyag pananglitan, nadawat nato ang kandila nga nagsimbolo sa kahayag ni Kristo ug gihagit kita nga padilaabon kini sa kanunay. Nadawat usab nato ang puting sapot nga nagsimbolo sa atong pagkabag-ong binuhat diha kang Kristo, ug atong kaakuhan nga ampingan ang maong puting sapot. Ang pangutana, nagtamud ba kita niining maong kaakuhan?

Usahay ato lang gipasagdan nga maawop ang kalayo sa atong kandila sa pagtoo, ug atong gimantsa-mantsahan pinaagi sa atong pagpakasala ang puting samot sa atong pagka Kristiyano. Kini tungod kay ang atong kasing-kasing usahay anaa man sa mga butang kalibutanon, inay sa mga butang langitnon.

Atong hinumduman, nga kung diin ang atong bahandi ug katigayunan, atua usab ang atong kasing-kasing didto naga-uban.

No Comments

Post A Comment