IEC One day experience bikaryato sa Sta. Ana

Walo ka gatos ka parokyano gikan sa upat ka parokya sa Bikaryato sa Sta. Ana ang miduyog sa gipahigayon nga IEC One Day Experience diha sa sulod sa Simbahan sa San Antonio de Padua, Agdao, niadtong Agosto 13.

Morning prayer, exposition sa Blessed Sacrament nga gipanguluhan nila Fr. Henry Campeon ug Fr. Toto España ang nahitabo sa buntag. Gipasalida sab ang talk ni Bishop Baron didto saa IEC Cebu. Kini gipasayon ni Fr. Ritsche Gamaya pinaagi sa paghubad sa bisaya ug pagpaambit sa iyang mga kasinatian kabahin sa Eyukaristiya isip usa ka pagkaon, sakripisyo ug presensya sa Ginoo.

Tungod niini ang pagpaambit nga gi-facilitate ni Fr. Arnold nahimong mabungahon. Lima ka parokyano ang mitindog aron sa pagpadayag; duha ang nag-ingon nga ang Yukaristiya presensya sa Ginoo. Ang tulo miila nga kini usa ka sakripisyo. Gani, matud pa sa usa ka batan-on, ang iyang sakripisyo nga pagahimoon mao ang dili pagtagad sa iyang cellphone sulod sa Santos nga Misa; nga siya maminaw na gayud sa Pulong sa Ginoo. Ang tanan nga naminaw namalandong usab sa ilang nadungog.

Dugang sa pamalandong ang mga testimonya sa 2 ka pamilya mahitungod sa kalambigitan sa Eyukaristiya sa ilang kinabuhi. Ang Argentinian nga pamilya nga nagtestimonya sa Cebu nakit-an pinaagi sa video presentation. Ang ikaduhang pamilya, ang Cañete family, personal nga mihatag sa kasinatian sa ilang pamilya. Gikan sila sa Parokya sa San Antonio de Padua ug sa hataas nga panahon mialagad diha sa Eyukaristiya. Ang amahan, si Cocoy, usa ka PSL ug Lay Minister, ang asawa, si Mary, choir member, ug ang duha sa ilang tulo ka anak mga altar servers.

Gitapos ang panagtapok sa Santos nga Eyukaristiya nga gipanguluhan ni Bishop George Rimando inubanan sa mga kaparian sa Bikaryato. Sa iyang Homiliya, si Bishop George miingon nga adunay timailhan nga makita diha sa tawo nga modawat sa Eyukaristiya; nga siya mosunod sa balaod sa Dios, nga mabag-o ang iyang kasingkasing- inanay nga mahamtong ug mahimo siya nga sama sa bata nga mapaubsanon. Giawhag niya ang mga pamilya ug mga GKK nga magpadayon sa pagtubo, paglambo, pagsunod sa balaod sa Dios, ug magmapaubsanon nga moduol sa Ginoo. (Elena Mozo|Parish SoCCom)

No Comments

Post A Comment