Sta Cruz Parish Musicians

Sta. Cruz Parish, gideklarang ika-39 nga parokya sa Arkidayosis sa Davao

Sta Cruz Parish Musicians

Katawhan ang Simbahan. Dili lamang istruktura ang nakapahimong Simbahan sa bag-ong nadeklara nga parokya sa Talicud Island, IgaCoS, niadtong Dominggo. Tungod sa kaaktibo sa mga miyembro niini sama na lamang sa ilang music ministry members, nakakita pa ang mas daghan ug higayon aron padayon nga mapaambit ang ilang talento sa pagtugtog. Mas mapalig-on pa unta ang pagtoo sa katawhan dinasig sa mga huni dinuyogan sa mga instrumento sama sa violin, cymbals, organ, ug gitara. Sa ilang pagbalhin sa Talicud, makakita napud ug kahulip nila ang mga taga Kaputian. (Photo: Boy Ugay)

Sa dugay na nga panahon ug sa makadaghang higayon, inubanan sa pagpaningkamot ug pag-ampo sa mga parokyano sa Talicud island, ang planong pag-abli sa bag-ong parokya natuman ra gayod niadtong Agosto 21, 2016. Uban ang pag instalar sa unang kura paroko nga si Fr. Rico Enriquez, ang Sta. Cruz GKK nahimo na gayung parokya.

Ang parokya sa Sta. Cruz mao ang ika-39 nga parokya sa Arkidayosis sa Dabaw.

Pinangulohan ni Abp. Romulo G. Valles, D.D., ang pagdeklara nahitabo sulod sa Santos nga Misa. Daghang mga parokyano, relihiyoso, ug mga bisita gikan sa nagkalain-laing dapit ug nagkadaiyang ministriya sa Simbahan ang nakigduyog sa maong selebrasyon.

Ang mga bata ug batan-on dala ang flaglets misugat kang Abp. Valles. Gani, banda usab ang mi-eskort niya. Sa iyang homiliya, pipila ka punto ang iyang gisubay, apan ang halangdon sa tanan mao ang pag ka instrumento sa Simbahan aron mahiusa sa tanang katawhan. Matod pa niya kini mao ang misyon ug rason sa pagmugna sa simbahan.

Emosyonal ang parokyanong si Imelda Rebota kay wa siya magdahum nga mamahimo gayung parokya iyang kapilya.

Dakong kalipay sad ang gibati sa mother parish niining Sto. Niño Parish, sa Kaputian. “Nalipay ko kay nahatod na g’yud sa ilang tugkaran ang pulong sa Diyos. Di na nila kinahanglang mutabok kay labangaunon kaayo to,” matud pa kang Zora Caracas. Dili napud kinahanglang mag overnight sa PSL sa Kaputian aron makakuha ug hostiya aron dad-on sa ilang tagsa tagsa ka GKK pagka Dominggo.

Buot ipaabot ni Fr. Rico Enriquez, ang una og kasamtangang kura paroko sa Sta. Cruz Parish ang iyang pasalamat sa mga parokyano sa ilang iyang gidumala nga parokya tungod sa kooperasyon ug pagpaningkamot sa matag-usa aron madayun ug magmalampuson gayod ang pagkamugna sa parokya.

Isip Vicar Forane, miingon si Fr. Danilo P. Dotollo, DCD, ang kura paroko pud sa Immaculate Conception Parish, Peñaplata: “Dako nako nga kalipay kay nakita nako ang enthusiasm sa mga parokyano sa Talicud tungod sa pagkahimong parokya sa Sta. Cruz. Nalipay ko kay upat na gyud ang parokya sa Samal which is a good thing aron mas mulig-on pa ang pagtoo sa mga parokyano nga Samaleños.”

Sa pagkakaron, isip bag-ong parokya, duha ka misa ang saulogon kada Dominggo. Ang unang Misa magsugod sa alas 7:00 sa buntag, dayon ang ikaduhang misa magsugod alas 10:00 sa buntag. (Merry Love Asoy | SNKP SoCCom)

Save

No Comments

Post A Comment