Ordination in Tagum

Walo ka pari giordinahan sa Tagum

Ordination in TagumGipili gikan sa katawhan sa Dios.

Kini ang giingon sa Obispo sa Diyosesis sa Tagum, Bishop Wilfredo Manlapaz ngadto sa mga kaparian nga iyang gi-ordinahan.

Sa gipahigayong misa ug rito sa ordinasyon didto sa Christ the King Cathedral niadtong Oktubre 7, giingon ni Bp. Manlapaz nga isip mga pinili, gihagit niya sila nga buhaton ang ilang bahin diha sa pagbuhat sa mga buluhaton ni Kristo dinhi sa kalibutan.

Dugang usab niya nga kabahin sa buluhaton sa mga kaparian ang pagdala sa mga magtotoo diha sa pamilya sa simbahan ug luwason ang mga nahisalaag.

Gawas sa pagsaulog sa mga sakramento, giawhag usab niya ang mga kaparian nga unta ang pagtulon-an sa simbahan mamahimong kusog sa katawhan ug ang ilang pulong ug buhat magpalambo sa pagtoo.

Gipadayag sa mag bag-ong pari ang ilang kalipay nga midawat sila sa sakramento sa ordinasyon ug nanghinaut sila nga ang katawhan magpadayon nga mag-ampo alang kanila ug sa ilang bokasyon.

Ang mga gi-ordinahan sila si Fr. Adoni Buladaco, Fr. Lou Jake Colarines, Fr. Nino Estebaya, Fr. Robert Legaspi, Fr. Ianeil James Melendres, Fr. Rey Ringo, ug Fr. Rey Nino Rosal.

Si Fr. John Kristoffer Nalam giordinahan niadtong Oktubre 12 didto sa iyahang parokya sa Nuestra Señora del Pilar Quasi-Parish sa Babag, Compostela Valley.

Kahinumduman nga ang Diyosesis sa Tagum ang giila nga adunay daghang kaparian nga gina-ordinahan matag ordinasyon ug kini nahimong posible tungod sa impluwensya sa Gagmay’ng Kristohanong Katilingban kon GKK diin kadaghanan sa mga ginikanan sa mga kaparian adunay kalambigitan isip lideres kon dili man aktibong miyembro.

No Comments

Post A Comment