Family Day gisaulog sa San Nicolas FLA

Family Day gisaulog sa San Nicolas FLA

Ang Family and Life Apostolate (FLA) gikan sa mga Gagmayng Kristohanong Katilingban (GKK) sa San Nicolas de Tolentino Cathedral Parish nagsaulog og usa ka adlaw alang sa pamilya kansang katuyuan nagsubay sa tema nga: “Tuig sa Pamilya ug Eyukaristiya – Pamilyang Pilipino Disiplinado sa Eyukaristiya”. Sa ilahang pagtagbo, naghalad ang mga FLA Workers (FLAW) og Misa Pasalamat nga gidumalahan ni Kura Paroko Rev. Fr. Edito S. Baño, alang sa malampusong pagpangalagad isip tigpahiluna sa Sakramento sa Kaminyoon alang sa kalambuan sa pamilya diha sa mga GKK nga ilang gialagaran.

Pagkahuman sa kasaulogan sa Santos nga Eyukaristiya, miadto ang grupo ngadto sa baybayon sa Pujada sa Brgy. Central sa siyudad sa Mati. Ang kalihukan sa buntag nakahatag og panahon sa pagpamalandong pinasubay sa gipaambit ni Sr. Florita Galido, MIC, bahin sa relasyon sa ginikanan sa anak. Ang salu-salong paniudto gisundan sa mga dula nga giingong gikahimut-an gayud tungod sa daghang mga premyo nga nadawat gikan ni Parish FLA Coordinator Mrs. Maria “Bebs” Gayta.

Quiz on the Year of the Family

Sa laing bahin, nakakuha sa “Top Scorer Prize” sa Quiz on the Year of the Family and the Eucharist si Taguibo FLAW, Mrs. Betty Ligad. Ang Quiz maoy bunga sa mga binulan nga “input” nga ginahatag ni Mrs. Linda Mahumot sa mga FLAW sa Mati Cathedral.

Sumala ni Gng. Mahumot, ang usa ka adlaw nga panagdait ug panaghiusa uban sa mga managtiayon ug ilang mga anak naghatag gayud og kahulugan kon unsa ka suod ang mga FLAW isip usa sab ka pamilya sa FLA sa parokya. Dugang pa niya, “nagmalampuson usab ang maong kalihukan tungod sa pagtinabangay sa mga pangulo sa apostolado.”

Samtang napili ang mga bag-ong opisyales sa FLA alang sa tuig 2017 nga mao sila si: Mr. Edgardo Bagay – President, Mr. Edgardo Ventura – Vice President, Mrs. Gemma Pansoy – Secretary, Mrs. Bernadeth Lacia – Asst. Secretary, Mrs. Diosa Canencia – Treasurer, ug Mrs. Flordeliza Ramos – Asst. Treasurer.

No Comments

Post A Comment