Hesus Nazareno sa Cathedral nagsaulog sa kapistahan

Prusisyon sa Mahal nga Adlaw sa Itom nga Nazareno ibalik

Ang San Pedro Cathedral nagsaulog sa kapistahan ni Hesus Nazareno nga giduyugan sa mga deboto niini, niadtong Enero 9. Kini gisugdan pinaagi sa Misa dayon ang “Traslacion.”

Sumala kang Juliet Jacinto, 60 anyos, taga San Lorenzo Parish (Talomo) nga 35 tuig na siya isip deboto ni Hesus Nazareno sukad pa niadtong naa pa siya sa Maynila, ug hangtod karon nga naa na siya dinhi sa Dabaw. “Basta tinuod ka lang sa iyaha, ug tininuod imong pag-ampo, ihatag gayud niya kadugayan (ang imong gipangayo).”

Natandog ang kasing-kasing ni Mila Gill, head organizer sa pagsaulog tungod kay daghan siya ug nakita nga mga gagmay nga bata nga nakasul-ob ug t-shirt nga naay printa sa Hesus Nazareno, og nag atang nga mga tawo gunit ang ilang mga panyo aron mabendisyunan. Kapin 300 sad ang nakaapil sa prusisyon. “Mudugok man ang tawo sa Nazareno kasi murag makarelate ang tawo ba kay gapas-an baya ta ug krus, so ingon ana nga magpatabang ta sa iyaha pagpas-an sa atong mga cross,” sumala pa ni Mila.

“Ang icon gikan sa Spain niabot niadtong 1936. Ang Capili family ang nag donate niini ingon sa akong mama, niya gi entrust sa akong lola nga si Maxima Josol. Niabot ang panahon nga dili na siya iapil sa prusisyon sa Good Friday kay di na kuno “relevant,” so kini nabutang lang sa ilalum pag-renovate sa San Pedro. Tapos gipananghid sa akong magulang nga dalhon sa balay. Nag stay sa balay ug 14 years. Hangtud sa naghangyo akong mama, tigpanahi sa sanina sa Nazareno, nga ibalik siya sa balay. Niabot si Msgr. Nards Vicente, giadtuan niya sa balay, November 27, 2012 dayon nag decide nga ibalik basta naay mag take care sa devotion mao nang nagsugod ang novena sa Cathedral kada Biyernes, alas 5.” Sa ato pa, 81 anyos na kining Hesus Nazareno sa San Pedro Cathedral sukad siya miabot dinhi sa Dabaw.

Sa pagsuporta sa arsobispo sa Dabaw sa kasamtangan, ang pagprusisyon ibalik niya karong Biyernes Santo. (Claudine Chicote | HCDC intern)