Ang Tawag sa Pagkabalaan

Feb. 19, 2017, 7th Sunday in Ordinary Time
Lev. 19:1-2,17-18/ 1 Cor. 3:16-23/ Mt. 5:38-48

“Ang matag binunyagan gitawag nga mamahimong balaan…” Kining maong mga pulong kanunay natong madungog isip panamilit nga mensahe ni Fr. Ritche Gamaya diha sa usa ka programa sa DXGN 89.9 SPIRIT FM nga giulohan ug MGA BAYANI SA PAGTOO.” Mao usab kini ang mensahe sa atong mga pagbasa niining ika-pito nga Domingo sa Ordinaryong Panahon.

Diha sa atong unang pagbasa ang Ginoo nagsugo kang Moises sa pagsulti sa katawhan nga kinahanglan nilang magkinabuhi nga balaan tungod kay ang Diyos balaan man. Si San Pablo usab diha sa ikaduhang pagbasa, nagpahinumdum sa katawhan sa Corinto nga sila mao ang templo sa Diyos, ug kining mao nga templo balaan. Kini mas gipahingusgan ni San Mateo diha sa Ebanghelyo diin miingon siya “paningkamot kamo mamahimong perpekto tungod kay ang Amahan nga atua sa langit perpekto usab…”

Mga igsoon atong hinumduman nga dinhi sa kalibutan tingali wala gayo’y tawo nga perpekto, apan ang tawag sa pakabalaan tawag alang sa tanan. Oo tinuod gayud nga ang matag binunyagan gitawag sa pagkabalaan. Matud pa adunay tulo (3) ka pamaagi sa pagtubag niining maong tawag. Kini mao ang giilang bokasyon sa matag tawo. Adunay mga tao nga ang ilang tubag sa tawag sa pagkabalaan mao ang pagpabiling ulay o “Single Blessedness.” Gipili nila nga dili magminyo, dili tungod kay napakyas sila sa gugma kundili tungod kay mas gipili nila ang paghigugma sa Diyos. Ang uban gipili nila ang bokasyon sa kaminyoon isip tubag sa tawag sa pagkabalaan. Nan sa ato pa, ang matag managtiayon diay gitawag nga mamahimong balaan pinaagi diha sa ilang pagpuyo nga matinud-anon sa ilang mga saad sa kaminyoon. Sama ra usab diha sa ikatulo nga pamaagi sa pagtubag sa tawag nga mao ang pagsulod sa relihiyosong kinabuhi isip madre o kaha pari. Gani maingun nato nga mas dako ang hagit sa pagkabalaan sa mga kaparian ug kamadrihan tungod kay aduna usab silay katungdanan sa paggiya ug pagtabang sa katawhan aron lagi madani usab sila sa kinabuhing balan.

Apan bisan unsa paman ang imong estado sa kinabuhi, minyo man ka, ulay, o kaha madre o pari, ang mahinungdanon nga kanunay natong matngunan, nga sukad karon, sa matag desisyon nga atong himoon, ug sa matag lakang nga atong buhaton, atong pangutan-on ang atong kaugalingon “Makatabang ba kini kanako diha sa akong panaw ngadto sa pakabalaan. Igsoon, hunong usa, ug pamalandungi una, kanang imong gihuna-huna karon, ug kanang imong pagabuhaton, makatabang ba kana kanimo aron imong matubag ang tawag sa pagkabalaan? (Rev. Christopher Alcayde)