GSL nagtuon sa pagsulat ug balita

San Pedro Calungsod Quasi Parish

Ang Parish Social Communications Committee sa San Pedro Calungsod Quasi Parish nagpasiugda ug Media Baby Ka Ba? Journalism Writeshop Seminar niadtong Pebrero 11, 2017 sa parokya sa Baguio District.

Singkwenta ka mga partisipante gikan sa 5 ka sona ang misalmot sama sa GKK Servant Leaders nga Secretaries, Treasurers, PSK ug PSP, volunteers nga mga batan-on gikan sa GKKs ug mga estudyante sa Wines Elementary School. Sila ang mga interesado nga mahimong miyembro isip GKK SoCCom.

Ang maong seminar gidumala sa Davao Verbum Media Foundation, Inc. Training and Support Department. Giorganisa ang seminar aron makakat-on ang mga partisipante sa pagbuhat og report kabahin sa ilang kalihukan sa tagsa-tagsa ka GKKs ug katilingban.

Adunay lecture sa buntag, samtang pagkahapon nagpili sila og “headline” sa Davao Catholic Herald nga nakapatandog kanila nga ila pung gipadayag sa ilang grupo.

Gihatagan sad og higayon ang mga partisipante sa pagbuhat og balita sa ilang katilingban gamit ang “KUKANG” (Kinsa, Unsa, Kanus-a, Asa, Ngano, Giunsa).

Matud pa ni Joegina Lobetos, usa ka PSP sa St. John Eudes GKK (Malagos) nga na-“enjoy” siya pagbuhat og report gamit ang “KUKANG”. Dugang sab ni Edriel Ordista, usa ka GKK SoCCom sa Immaculate Conception Baguio, nga bulahan sila nga nakaapil sa seminar nga libre ug daghang nakat-onan. Wala sab kuno nakawang ang iyang paggahin sa iyang oras aron makasalmot. Nakat-unon sab niya nga dili importante nga “expert” sa English ug ang importante nga mahatag ang report nga han-ay ang mga detalye ug dapat masabtan kini sa mga naminaw. Nihatag sab og mensahe si Fr. Ricky T. Flores sa mga nisalmot ug nagpasalamat sa DVDMFI sa paghatag sa maong seminar.

Atol sa 5th year anniversary sa Media Baby Ka Ba? ang maong seminar, ang “graduation rites” gipahitabo sa usa ka commitment ritual. Naguli ang partisipante nga puno sa inspirasyon. Kahinumduman nga niadtong Pebrero 11, 2017 gipahitabo ang kinaunhang journalism seminar ubos sa kasamtangang administrasyon sa San Francisco de Asis Parish, Tagakpan. (Lorelyn Lahoylahoy | SPCQP SoCCom)