Kalampusan sa pista sa Our Lady of Lourdes, bunga sa panaghiusa

Sugod karong tuiga, ang parokya sa Our Lady of Lourdes sa Bangkal magsaulog na sa kapistahan sa mismong adlaw sa Pebrero 11. Subay sa tema, “Ang Nagkahiusang Katawhan sa Parokya nga Nangalagad Uban ni Maria,” ang piyesta sa OLLP malipayong gisaulog.

BISPERAS
Sa bisperas sa kapistahan, ang 25 ka mga GKK nag prusisyon sayo sa buntag dala ang ilang mga kaugalingong imahe padulong sa simbahan sa OLLP nga naglarawan sa kahiusahan sa mga GKK sa parokya nga nangalagad uban ni Maria, ang Babaye sa Lourdes.

Malipayong nagtapok ang mga parokyano gikan sa nagkalainlaing GKK nga naglarawan usab sa Tuig sa Parokya. Kalipay nga puno sa grasya tungod kay bagohay lang gibisita ang parokya sa imahe sa Birhen sa Fatima niadtong Pebrero 6, ikalimang adlaw sa nobena.

“Bulahan gayud kita nga gibisita sa Babaye sa Fatima diri sa atong parokya sa Lourdes sulod sa panahon sa atong kapistahan,” matud pa ni Marilyn Lallen, katekista ug coordinator sa Worship Ministry sa OLLP.

Malipayon usab ang gatusan ka mga masakiton ug katigulangan sa parokya nga nagtapok sa simbahan sa Kumpisal ug Misa alang kanila sa hapon sa bisperas; ug sa gabie gipahigayon ang GKK Leaders’ Night diin ang Dance Sport giapila sa partisipante gikan sa Districts 1, 3 ug 7.

KAPISTAHAN
Gawas sa tibuok adlaw nga Misa, sa hapon sa mismong kapistahan, gipahigayon ang “Larong Pinoy” ug ang programa diin gihatagan ug premyo ang mga nidaug sa mga lain-laing dula ug uban pang aktibidad.

Ang District 1 nadaug sa basketball category A ug B, sa Sack Race ug sa Maria and Mario Went to Town; ang District 3 sa Egg Catching ug ang District 5 sa Paint Me a Picture. Ang Most Valuable Player (MVP) Award sa basketball nakuha sa District 1 nga si Alvin Neri sa Category A, samtang si Ruben Neri ang MVP sa Category B.

Ang nakadaug sa Fun Run sa mga lalaki mao si Ryan Temoner sa District 3 La Purisima GKK, samtang sa mga babaye si Jane Viola Leonides gikan sa District 7 Santiago GKK. Nanguna sa Fun Walk si Edren Galeno sa mga lalaki, ug si Glory Vic Roxas sa mga babaye, pareho naggikan sa District 1 San Juan GKK.

Sa Zumba, ang Best in Attire sa mga batan-on mao si Nicole Lapenid, ug sa mga hamtong si Analiza Castrodes. Ang Best Performer sa mga batan-on mao si Jessel Yangco, ug sa mga hamtong si Vangie Sabaricos.

Ang OLLP PSL malipayong nakigdula ug basketball sa Davao Clergy nga gibidahan nila Fr. Johnny Autida, Fr. Leif Simbajon, Fr. Allan Rodriguez, Fr. Rene Ribac, Fr. Ricky Peñalosa, ug uban pa. Gipangunahan kini sa OLLP PSL Coordinator nga si Ruben Sumagang. Kini ang nagtak-op sa pista sa Parokya diin ang Davao Clergy nakadaug sa puntos, 125-119.

Ang kalampusan sa sports activities sa kapistahan sa parokya gipangunahan sa Sports Committee Chairperson nga si Violy Umbay, sa suporta sa Service Ministry Coordinator Alice Acebedo ug sa Parish Pastoral Council Coordinator Nestor Fruto. (Vonz Hijada | OLLP SoCCom)