Delas Alas, uban pang testimonya nagdasig sa PREX confab

Primyadong aktres sa pagpakatawa, Ang Tanging Ina sa pelikula. Mao kini ang kasagarang tawag sa mga fans niya. Apan sa nahitabong ika-14 nga Parish Renewal Experience (PREX) National Convention nga gipahigayon niadtong Pebrero 10-12, 2017 didto sa Malolos Sports and Convention Center, si Martina Eileen delas Alas, kon Ai-ai delas Alas wala lamang naglingaw sa katawhan. Naghatag usab siya ug testimonya sa iyang kinabuhi.

Atubangan sa dul an upat ka libo nga mga Kuya ug Ate gikan sa nagkalain-laing arkidayosis ug dayosis sa tibuok Pilipinas, ang aktres mipaambit sa iyang personal nga kasinatian, luyo sa iyang pagka inila isip artista. Daghan kuno siyang kapakyasan ug kasakit nga naagian, apan tungod niini milawom ang iyang pagtoo sa Diyos.

Makatandog pud ang personal nga kasinatian sa usa ka siyete anyos nga bata nga si Timoty Pepito. Gigasahan sa maayong tingog apan uhaw sa pagmahal ug pag-amoma sa iyang inahan, naningkamot kini ug nakasulod sa usa ka kids’ singing competition sa telebisyon.

Ang mga testimonya kabahin sa han-ay sa aktibidad nga nakapadasig sa tanang delegado sa Convention, gawas sa misa, animations ug talks.

PREX DAVAO DELEGATION

Kapin 60 sa 4,000 ka libong delegado gikan sa Arkidayosis sa Dabaw. Matud pa ni Ate Inday Sison, usa sa mga delegado sa Davao, wala gayud siya nagmahay nga mitambong siya sa maong nasudnong panagtapok kay daghan daw siya’g nakutlo ug napamalandungan sa iyang mga nadungog.

Tema sa maong panagtagbo mao ang “Amoris Laetitia: Galak ng Pamilyang Nagmamahalan, Galak ng Simbahan.” Naka sentro ang mga talks sa kasamtangang hulagway ug kahimtang sa matag pamilya ug unsay nahimong epekto niini sa tawo, sa kinaiyahan, sa komunidad, sa simbahan, ug sa relasyon sa Dios.

Giablihan ang maong panagtapok sa usa ka motorcade ug sa hapon gihimo ang pormal nga pag abli sa programa pinaagi sa Bible Enthronement unya misunod dayon ang misa. Talks ug joyful songs ang mitapos sa unang adlaw.

Napuno sab ang ikaduhang adlaw sa talks ug personal sharings. Natapos ang panagtapok niadtong Domingo, Pebrero 12 sa misa ug grand templo o ang pagsayaw ug pagkanta nga walay undang sulod sa 30 ka minuto.

Dili matukib ang gibating kalipay sa mga delegado tungod sa renewed experience nga nasinati sa maong Convention. Nagpasalamat ang tanan sa diocese sa Malolos sa mainitong pagtimbaya ug pag abi-abi sa tanang nangapil sa PREX National Convention 2017. (Eleanor Pascua | SMP SoCCom, Photos: Manuel Gaite | Myrna Silagan)