St. Jude nakigduyog sa REMASE Pastoral Day

‘Parokya: Ang Gasa sa Panaghiusa’

Nagsaulog sa Pastoral Day ang nagkalain-laing GKK nga sakop sa St. Jude Thaddeus, Malvar didto sa St. Francis Xavier Regional Major Seminary (REMASE), Catalunan Grande, niadtong Pebrero 26. Ang misa gipangulohan ni Most Rev. Jose Araneta Cabantan, D.D. nga taga Malaybalay,Bukidnon kauban sila Msgr. Abel Apigo, Fr. Rene Ribac ug ubang kaparian.

Subay sa tema, “Parokya: Ang Gasa sa Panaghiusa”, ang mga parokya sa Arkidayosis sa Dabaw ingon man ang Muslim community diha sa Panacan. Kabahin sila sa gipahigayong immersion sa mga seminarista sa REMASE.

Human sa paniudto adunay evaluation nga gihimo gikan sa mga GSLs didto sa kapilya. Mipadayag ang duha gikan sa Muslim Community ug duha usab gikan sa St. Jude. Kada usa kanila mipadayag sa ilang gibati sa maong immersion. Didto nasinati ang kahiusahan sa mga katilingban Muslim man o Kristiyano. Dako ang kalipay nga gibati sa seminarians kay sa maong immersion nagkasuod ang usa’g-usa ug nagkahiusa.

Nagpasalamat ang mga GKK Servant Leaders sa St. Jude sa mga seminarians ingon man kay Fr. Pedro Lamata , ug kaparian sa REMASE. (Ester Florece | Photos: Sean Michael Tesoro, Patricio Agudera)