UIC padayong nagatabang sa iyang “Friends”

Tulunghaan mitubag sa panawagan nga tabangan ang Voluntary Submission for Reformation person

‘“Friends” ang angay itawag sa mga drug reformist nga gikan sa tulo ka barangay sa dakbayan.” Kini sumala kang University of the Immaculate Conception (UIC) Kaduyog Program Head nga si Dra. Corazon Umblero diha sa ilang ikatulong panagtagbo uban ang pipila ka mga opisyal sa barangay niadtong milabay’ng bulan diha sa UIC Main Campus, Fr. Selga St. dakbayan sa Davao.

Ubos sa programa sa UIC Community Development Service (CDS), mipahayag niini si Umblero sa mga volunteers ug empleyado sa UIC aron mabati sa reformists nga higala sila sa eskwelahan.

Ang maong programa natukod isip tubag sa panawagan nga angayang tabangan ang mga tawong nahilambigit sa mga ginadiling droga. Katambayayong sa UIC-CDS ang University Guidance Center nga gipamunoan ni Ms. Mary Rose Chavez.

Sulod sa programa ang pagpadula ug pagproseso sa ilang mga “Friends.” Panghinaut sa eskwelahan nga ang ubang programa niini pagahimuon na matag Sabado uban sa mga estudyante sa NSTP. Nagaandam usab ang eskwelahan ug food packs aron mabitbit sa ilang “Friends” pag-uli.

Pinaagi niini sa hinay-hinay makatabang ang tulunghaan bisan pa sa ginagmay nga mga butang. Sa kasamtangan, nagapadayon ang maong grupo sa pagmugna ug mga programa alang sa “Friends” sa UIC. (Rusty S. Corsame | SMP SoCCom)

Post Your Thoughts