Ang tanang Katoliko magsul-ob sa Skapularyo sa Carmel

Sa Setyembre 13, 1917, sa ika-5 nga apparisyon sa Birhen sa Fatima ngadto sa mga bata nga si Lucia Francisco ug Jacinta, iyang gipahibalo kanila nga sa sunod bulan sa Oktobre, moabot ang Birhen sa Carmel. Ug tuod man, nakita gayod nila ang Birhen sa Carmel sa Oktobre 13, 1917, naggunit og skapularyo nga brown sama nga siya kanunay nagpakita nga naggunit og rosaryohan.

Pagdako na ni Lucia, nahimo siyang madre sa Carmel – Sr. Maria Lucia sa Putling Kasingkasing (Sr. Lucia). Ug niadtong 1940 gipahayag niya sa mga Carmelitanong pari nga si Fr. Donald O’Callahan, Father Albert Ward, ug Father Luis Gonzaga de Oliveira, nga buot sa Birhen sa Carmel nga ipakaylap ang debosyon sa balaang skapularyo sa Carmel. Matud pa ni Sr. Lucia, “gigunitan sa Birhen sa Carmel ang skapularyo aron ipahayag nga buot niyang isul-ob kini natong tanan.”

Tungod niini, ang pagrosaryo matag adlaw ug ang pagsul-ob sa skapularyo sa Carmel nagkadugtong o nasumpay. Ang skapularyo nahimong sacramental sa dakong debosyon sa Katoliko ngadto sa Mahal nga Birhen Maria ilabina sa pagtuman sa iyang gipangayo nga magrosaryo. Sa ato pa, nahimo kining timaan sa atong konsagrasyon sa Mahal nga Bireheng Maria.

Pinaagi ni St. Simon Stock, gipahayag sa Birhen sa Carmel niadtong July 16, 1251 ang usa ka importanteng saad – “Dawata kining skapularyo. Kinsa kadtong mamatay nga nagsul-ob niini dili gayod mag-antos sa walay katapusang kalayo. Mahimo kining timaan sa kaluwasan, panalipod sa panahon sa peligro ug timaan sa saad sa kalinaw.”

Human sa 80 ka tuig, kining maong saad gipakusog pa gayod pinaagi sa dugang pang pahayag sa Birhen kay Jacques Dueze – “Kadto sila nga nasul-oban sa skapularyo sa Carmel maluwas gikan sa Purgatoryo sa primerong Sabado human sa ilang kamatayon.”

Timan-an nato ang mosunod. 1. Dili pwede ang plastic nga skapularyo. Kinahanglan skapularyong brown nga panapton ang isul-ob. 2. Benditado sa Pari. 3. Ang Pari gayud ang kinahanglan magsap-ong kanimo.

Tinuod nga dili gayud kinahanglan nga magsul-ob sa skapularyo aron maluwas. Mahimo gihapon kita maayo ug sulundon nga katoliko. Apan dili pud nato maingon nga dili kini makatabang sa atong kahamtungan sa pagtoo sa Dios ug sa Simbahan. Kon duna man rason nga atong himoon kini wala nay lain pa kon dili, GIPANGAYO UG GISAAD KINI SA MAHAL NGA BIRHENG INAHAN SA DIOS – ANG BIRHEN SA FATIMA, BIRHEN SA CARMEL.

Alang kanako igo na kini. Tungod ni Mama Mary. Sukad pa niadtong Setyembre 8, 1980, ako nang gisul-ob ang Birhen sa Carmel. Viva Maria Viva Jesus.

No Comments

Post A Comment